Pavlodarlyqtar qoqys jınap júrip, marafon júgirmek
PAVLODAR. QazAqparat - Pavlodarda «Jasyl el» jasaqtary tańǵajaıyp ekologııalyq marafon - «JASYL CROSS - 2019» ploggıngin uıymdastyryp jatyr, dep habarlaıdy QazAqparat tilshisi.
«Ekologııalyq marafonnyń negizgi maqsaty salaýatty ómir saltyn nasıhattaý, ekologııalyq mádenıetti qalyptastyrý, qala turǵyndaryn sport jáne deneshynyqtyrýmen aınalysýǵa shaqyrý, jalpy Pavlodardaǵy ekologııalyq jaǵdaıdy jaqsartý», - deıdi «Jasyl el» eńbek jasaqtary oblystyq fılıalynyń músheleri.
Uıymdastyrýshylardyń aıtýynsha, «JASYL CROSS - 2019» ploggıngi ekologııalyq marafony 20 sáýir kúni Ýsolka shaǵyn aýdanynda ótedi. Oǵan avtomobıl kópirinde 10:15-te start beriledi.
«Bıylǵy marafondy uıymdastyrýǵa kóptegen pavlodarlyq kompanııalar jáne Pavlodar oblystyq Jastar bastamalaryn damytý ortalyǵy qolǵabys etip otyr», - deıdi «Jasyl el» fılıalynyń jetekshisi Roman Krasnoşekov.
Marafon aıasynda mádenı, oıyn-saýyq is-sharalary da ótkiziledi.
«Bıylǵy marafonǵa 200-den astam adam qatysady», - deıdi Roman Krasnoşekov.
Ploggıng - salaýatty ómir saltyn saqtaý men ekologııany qorǵaýdyń býdany deýge bolady. «Ploggıng» sózi júgirý kezinde qoqys jınaýdy bildiredi. Fıtnes jattyqtyrýshylardyń pikirinshe, osyndaı tańǵajaıyp marafon kezinde 30 mınýtta 288 kılokalorııaǵa deıin energııa jumsaýǵa bolady.
«2018 jyly Pavlodarda alǵash ret tolyq marafon ótti. Oǵan qalanyń 150 turǵyny qatysty. 30 mınýtta Ýsolka ózeniniń jaǵasynan 300 qap - 2 tonnadaı qoqys jınaldy», - deıdi uıymdastyrýshylar.
«JASYL CROSS - 2018» ploggıng marafony TMD elderindegi halyqaralyq jastar forýmynyń qorytyndylary boıynsha, TMD-daǵy úzdik jastar is-sharalarynyń úshtigine ilindi», - deıdi Roman Krasnoşekov.
Avtor: Anton Gagarın
