Pavlodarlyqtar Glasman tigin fırmasynyń mektep formasyn alý úshin uzyn-sonar kezekte turýǵa májbúr
ASTANA. QazAqparat - Pavlodarlyq ata-analar saýda ornynyń ekinshi qabatyndaǵy Glasman tigin fırmasynyń dúńgirsheginen mektep formasyn alý úshin uzyn-sonar kezekte turýǵa májbúr, dep jazady «Saryarqa samaly» gazeti.
Pavlodar qalasynyń turǵyny Álııa Qudaıbergenovanyń balalaryna mektep formasyn satyp ala almaı júrgenine bir aptaǵa jýyq ýaqyt bolǵan. Onyń uly men qyzy №37 jalpy bilim berý mektebinde oqıdy.
«Oqý jyly aıaqtalǵanda Glasman tigin fırmasyna eki balama mektep formasyna tapsyrys berip, aldyn ala tólem jasaǵan edim. Qyzmetkerler balalarymnyń kıim ólshemin alyp ketken edi. Aqshasy tólengen soń, oqý jyly bastalarda kıimderin alyp ketemin degen oıda edim. Biraq balalaryma sáıkes keletin kıim tappadym. Sebebi mólsheri úlken. Osy jerde júrgenime 5 kún boldy. Mektepke baratyn kún de jaqyndap qaldy. Ýaqyt tyǵyz. Ne isterimdi bilmeımin», - dep nalıdy ata-ana.
Kópshiliktiń aıtýynsha, mundaǵy mektep formasynyń baǵasyn báriniń qaltasy kótere bermeıdi . Máselen, er balanyń keýdeshesi - 4 myń, pıdjagi - 10-13 myń, shalbar - 5-7 myń, jeıde - 3700 teńge turady. Al qyzdarǵa arnalǵan pıdjak - 10-13 myń, ıýbka 5-7 myń, shalbar 5-7 myń, keýdeshe - 4 myń, jeıde 2700-7000 teńge aralyǵynda satylady. ıAǵnı bir balaǵa ortasha eseppen 20-25 myń teńge jumsalady.
Oblystyq bilim berý basqarmasy basshysynyń orynbasary Saıan Muqanov Glasman tigin kompanııasyna kezektiń kóptigin fırma ónimderiniń sapasymen baılanystyrdy. Onyń aıtýynsha, oqýshyny atalmysh tigin salonynan kıindirýdi ata-analar komıteti jáne mektep basshylyǵy birlesip sheshken. Sondaı-aq, Glasman kompanııasy mektep formasyn naryqtyq baǵamen satyp otyrǵanyn jetkizdi.
