Pavlodarlyqtar Ertis kaskadyndaǵy sý qoımalarynan keletin sý kólemin azaıtýdy ótindi
ASTANA. QazAqparat - Ótken jyldyń jeltoqsanynda qoldanysqa berilgen Ortalyq Azııadaǵy eń iri kópir ótkeli bıyl Ertis kaskadynan jiberilgen sýdy qarsy almaq.
Osyǵan oraı Pavlodar oblysynyń basshylyǵy sý jiberý kestesine ózgeris engizýdi ótindi, dep habarlaıdy pavlodarnews.kz.
Bul týraly búgin Pavlodar oblysy ákiminiń orynbasary Dúısenbaı Turǵanov QR Premer-Mınıstri Baqytjan Saǵyntaevtyń aldynda esep berý kezinde habarlady.
«Óńirde kóktemgi tasqyn jaǵdaıy turaqty dep baǵalanýda. Eldi mekenderde tótenshe jaǵdaılar oryn alǵan joq. Ertis ózeninde seń júrý shtatty túrde ótip jatyr. Biraq ótken jyly Ertis ózeninde kópir ótkeli boı kótergendikten bıyl Shúlbi qoımasynan keletin sý kólemin 3500 tekshe metrden 3200 tekshe metrge deıin azaıtýdy ótinemiz. Tasqynnyń kópir ótkeli mańynan qalaı ótetinini bizge belgisiz. Sondyqtan ol jerde baqylaý jumystaryn jasaý qajet. Keıin sý kólemin tisti deńgeıge deıin ulǵaıtamyz», - dedi Dúısenbaı Turǵanov.
Eske salaıyq, sarapshylar bıyl sońǵy 20 jylda bolmaǵan kóktemniń kelgenin aıtýda. Sońǵy ret qar mol jaýǵan qys 1978 jyly bolǵan. Ǵaryshtyq saraptama qortyndysy boıynsha 2017 jyly 49 eldi mekende sý basý qaýpi tirkelgen. Sol aımaqtardaǵy 2 126 úıde 10 myńǵa jýyq adam turady. Oblystyq TJD bastyǵy Álibek Dlımovtyń bir aı buryn brıfıng barysynda aıtqan sózine súıensek, múmkin bolǵan tótenshe jaǵdaıdy joıý maqsatynda oblystyq jáne jergilikti bıýdjetten 893 mln teńge bólinse, onyń 36 mln teńgesi tasqyndy eskertý jumystaryna baǵyttalǵan. Mamandar barlyq jaǵdaıdy nazarda ustap jatyrmyz dep sendirýde.
