Pavlodarlyqtar erlikpen qaza tapqan jambyldyq órt sóndirýshige qurmet kórsetti

TARAZ. QazAqparat – 2021 jyldyń 26 tamyzynda Jambyl oblysynyń Baızaq aýdanyndaǵy jarylysta erlikpen qaza tapqan órt sóndirýshi Meıirjan Aımanovtyń sýreti beınelengen mýral Pavlodarda paıda boldy, dep habarlaıdy QazAqparat tilshisi.

Bul týraly qoǵam belsendisi Saıat Elgondenov málim etti.

Kórkem nysanǵa Pavlodar oblysynyń Tótenshe jaǵdaılar departamenti tapsyrys bergen. Mýral Pavlodar qalasynyń Qataev kóshesi, 46 mekenjaıdaǵy turǵyn úıdiń qabyrǵasynda salynǵan.

Marqumǵa arnalǵan estelik Pavlodar qalasynda kezdeısoq salynǵan joq. Ol 90-jyldardyń aıaǵynda Qazaqstan Respýblıkasy Іshki ister mınıstrliginiń Pavlodar tehnıkalyq kolledjinde bilim alǵan.

Sondaı-aq 25 mamyr kúni «Halyq qaharmanynyń» qurmetine Pavlodarda fýtboldan respýblıkalyq jarys ótedi.

Eske salaıyq, 2021 jyldyń 26 tamyzynda saǵat shamamen 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, joıqyn jarylys boldy. Sońǵy málimet boıynsha, Jambyl oblysyndaǵy jarylystan 13 adam qaza tapqan.

Prezıdent Qasym-Jomart Toqaevtyń Jarlyǵymen Meıirjan Aımanovqa «Halyq qaharmany» ataǵy berildi