Pavlodarlyqtar «Dıplommen aýylǵa» baǵdarlamasymen úı ala almaı júr

PAVLODAR. QazAqparat - Pavlodar oblysynda respýblıkalyq «Dıplommen aýylǵa» memlekettik baǵdarlamasynyń qatysýshylary jyljymaıtyn múlik baǵasynyń sharyqtaýynan jáne kóterme aqynyń ózgermeýinen baspanaǵa qol jetkize almaı júr, dep habarlaıdy QazAqparat tilshisi. 

Bul týraly Jastarǵa qyzmet kórsetý ortalyǵynda ótken Qazaqstan Parlamenti Májilisiniń depýtaty Álııa Saparovamen kezdesýde Pavlodar memlekettik pedagogıkalyq ınstıtýtynyń stýdenti Ernar Baltabaı málim etti.

Pavlodar oblysynyń jastar saıasaty máseleleri basqarmasynyń habarlaýynsha, «Dıplommen aýylǵa» memlekettik baǵdarlamasymen aýyldyq jerge jumysqa keletin JOO túlegine beriletin kóterme aqynyń eń joǵary shegi úsh mıllıon teńgeni quraıdy. Keıde budan da az. Bul somany aýyldyq jerdiń ákimdikteri anyqtaıdy  sodan keıin ǵana qarajatty jas maman respýblıkalyq transfert retinde ala alady. Al búgingi tańda úılerdiń quny jeti mıllıon teńgege deıin jetedi. Aýdan ortalyǵyndaǵy úıler aýyldyq okrýgpen salystyrǵanda qymbattyraq.

«Soma (kóterme aqy - QazAqparat) ózgergen joq, al baspana baǵasy toqtaýsyz ósýde. Demek, alty jyl buryn bekitilgen kóterme aqymen baspana alý múmkin emes, - dedi depýtatqa basqarma basshysy Natalıa Nefedova.  Máslıhat qosymsha qarjy bólý sekildi sheshim qabyldaı alady, biraq zańǵa sáıkes akt joq. Biz bul máseleni burynǵy Premer-Mınıstr Másimovtiń kezinde de kótergenbiz».