Pavlodarlyqtar bıyl kóriktendirý aılyǵyn erte bastaǵaly otyr
ASTANA. QazAqparat - Pavlodarda 2 sáýir - 2 mamyr aralyǵynda kóriktendirý aılyǵy ótedi. Bul týraly qalalyq ákimdiktiń keńeıtilgen májilisinde oblys ortalyǵynyń basshysy Nurjan Áshimbetov aıtty, dep habarlaıdy pavlodarnews.kz.
«Buǵan deıin jyl saıyn sáýir aıynyń ortasynda sanıtarlyq sharalar bastalatyn», - dedi qala ákimi Nurjan Áshimbetov. - Bıyl Mamyr merekeleri qarsańynda qalanyń taza bolýy úshin aılyqty erterek bastaýdy jón kórdik. Jyldyń jyly mezgili boıy kóriktendirý júrgizile beredi. Byltyr kóshelerdi memlekettik organdarǵa bekitýdiń nátıjesinde jaqsy jumys júrgizildi. Bıyl da kóriktendirý sharalary jalǵasyn tabatyn bolady.
Qalalyq TÚKSh, AJ jáne JK bóliminiń basshysy Erık Atıkeevtyń aıtýynsha, kóriktendirý aılyǵyna 50-den astam memlekettik mekeme men qala ákimdiginiń 15 bólimi qatysady. Keshendi josparǵa sáıkes Kýtýzov, Amangeldi jáne 1 Mamyr kósheleri jóndeledi. Búgingi tańda merdiger kompanııa retinde «Bonýs-Stroı» JShS anyqtalǵan. Jeti qıylysta baǵdarshamdar turǵyzýǵa shamamen 41 mln teńge, jol ótkelderine aǵymdy jóndeý jáne qorshaýǵa 5 mln teńgeden astam, aǵashtar men kóshetter otyrǵyzýǵa 30 mln teńge, gúlzarlarǵa 70 mln teńge jáne turǵyn úı oramdary ishindegi aýlalardy jóndeýge 1 mlrd 700 mln teńgege jýyq qarjy qarastyrylǵan. 626 jol belgisin ornatýǵa tenderdi «Ybyraev» JK utyp alǵan. Jumys kestege sáıkes Estaı - Kýtýzov - Kataev - Estaı kóshelerinde júrgiziledi. Tórt saıabaqty kóriktendirý júzege asyrylady. Bul jumystardy «Bonýs-Stroı» JShS sáýir aıynda bastaıdy. «Qazaqstan Alıýmınııi» AQ jasyl beldeý ornatady. Qala ákimi Nurjan Áshimbetov senbilikte qoqys shyǵarýǵa qajet tehnıka bıýdjet esebinen usynylatynyn eske saldy. - TÚKSh bóliminiń apattyq jaǵdaıda turǵan aǵashtardy kesýge arnalǵan bıýdjettik baǵdarlamasy bar. Qala turǵyndary bólimge habarlasyp, ótinish qaldyra alady, - dedi Nurjan Áshimbetov. - Turǵyn úı-kommýnaldyq sharýashylyǵy bólimi kún jylysymen joldardaǵy shuńqyrlarǵa qıyrshyqtas pen ınertti materıal tóseýdi bastaıdy. Kvartal ishindegi aýmaqty jınastyrýmen biz aınalysamyz. Ýchaskelik ınspektolar baqylaýsyz qaldyrǵan ári jabaıy qoqys oryndarynda bizdiń merdiger qorshaý ornatý qajet. QR Ákimshilik quqyq buzýshylyq kodeksine sáıkes barlyq jeke menshik ıeleri kóriktendirýmen aınalysýy tıis.
