Pavlodarlyqtar Astanadaǵy jármeńkege 750 tonna ónimin aparmaq
PAVLODAR. QazAqparat - 27-28 qyrkúıekte Astana ákimdiginiń mańyndaǵy ortalyq alańda Pavlodar oblysy ókilderiniń qatysýymen aýylsharýashylyq jármeńkesi ótedi, dep habarlady óńir ákiminiń baspasóz qyzmetinen.
Sharaǵa júzden astam sharýashylyq pen kásiporyn 200 mln. teńgeniń 750 tonna ónimin aparady. Onyń ishinde 100 tonna et jáne et ónimderi, 37 tonna sút ónimderi, 90 myń dana jumyrtqa, kartop, kókónister, un, jarma men makaron ónimderi, maı jáne bal bar. Barlyq taýarlar naryqtaǵy baǵasynan 15-20 paıyz arzan baǵaǵa satylady.
iri qara men qoı etiniń kelisi - 950 teńge, jylqy etiniń kelisi - 1200, kartop, sábiz, qyzylsha - 50 teńgeden, oramjapyraq pen qarbyzdyń kelisi - 40 teńgeden qoıyldy. Elordalyq jármeńkege «Rýbıkom», «KEMMI», «Krendel», «Sút» AQ, «REGTaım», «Altaı», «Saǵyp» sharýa qojalyqtary, «Aqjar - Óndiris» agrofırmasy óz ónimderin qoıady.
Sharýa qojalyqtarymen birge pavlodarlyq sportshylar, qolóner sheberleri, shyǵarmashylyq ujymdar kópshilikke ónerlerin kórsetýge keledi.
Sonymen qatar Astana alańyna úsh kıiz úı ornatylyp, onda dastarhan jaıylady. Qonaqtar Pavlodar oblysynyń jetistikteri týraly fılmdi tamashalaı alady.
