Pavlodarlyq jýrnalıster men blogerler Shyǵys Qazaqstannyń kıeli jerlerine barady
Bul joba Pavlodar jáne Shyǵys Qazaqstan oblystyq ishki saıasat basqarmalarynyń birlesken yntymaqtastyǵy aıasynda uıymdastyrylýda. Baǵyt Shyǵys Qazaqstan jeriniń tarıhı mándi jáne qasıetti oryndary men Ertis óńiriniń shekarasy - Abaıdyń «Jıdebaı bórili» tarıhı-mádenı, ádebı memorıaldyq qoryq mýzeıi, Qońyr áýlıe úńgiri, «Ablaıkıt» bekinis shirkeýi, tabynatyn tas, Rahman bulaqtary, Berel qorǵandary, Belýha taýy boıynsha ótedi.
Oblystyq ishki saıasat basqarmasynyń basshysy Ernur Dáýenov óńirde maýsym - qasıetti jerlerge saıahat aıy bolyp jarııalanǵanyn atap ótti.
«Mádenı jáne tarıhı ortaq mura bolyp tabylatyn Pavlodar jáne Shyǵys Qazaqstan oblystarynyń qasıetti jerlerin tanymal etý, óńiraralyq qarym-qatynastardy nyǵaıtý maqsatynda «Aqparat tolqyny» kishi baǵdarlamasy sheńberinde birneshe jobalardy birlese iske asyrýdy josparlap otyrmyz, - dedi Ernur Dáýenov.
«Onyń ishinde «20 sýretshi» pleneri bar. Atalmysh is-sharada eki óńirdiń sýretshileri qazaq halqynyń qundylyqtaryn, salt-dástúrlerimizdi, qasıetti jerleri týraly baıandaıdy.
Aıta ketelik, aımaqta 2017 jyly ishki saıasat basqarmasy ótkizgen «Qasıetti jerlerge saıahat» aýqymdy aktsııasynyń nátıjesinde Ertis óńiriniń qasıetti jerlerine 30000-nan astam adam kelgen. Pavlodar oblysynyń sakraldy oryndarynyń kartasyna tarıhı, tabıǵı-landshafttyq jáne qoǵamdyq-saıası mańyzy bar 78 nysan engizildi. Onyń 36-sy zerttelip, beseýi respýblıkalyq sakraldy oryndar tizimine engizildi.
