Pavlodarlyq júrgizýshiler 670 mln teńge kólik salyǵyn tólemegen
PAVLODAR. QazAqparat - Pavlodarlyq avtojúrgizýshilerdiń kólik úshin tólenetin salyq qaryzy 670 mıllıon teńgege jetken, dep habarlaıdy pavlodarnews.
Búgin oblys ortalyǵynda óńirlik ІІD men memlekettik kirister basqarmasy birlesip, kólik salyǵy boıynsha bereshegi bar avtokólik ıelerin tabý maqsatynda reıd ótkizdi.
«Kólik salyǵynan kóbinese qozǵaltqyshy tórt lıtrden joǵary bolatyn júrgizýshiler qashqaqtaıdy. Temir tulpar ıeleri qoldaryna salyǵy tólenbegeni jaıly eskertýdi alsa da, qaryzyn óteýge asyqpaıdy. Olarǵa salyqty tóleý úshin bir aı kóleminde ýaqyt beriledi. Eger budan esh nátıje shyqpasa, biz osyndaı reıdtterge shyǵamyz», - dedi Pavlodar qalasy boıynsha memlekettik kirister basqarmasynyń bólim jetekshisi Maqsut Qańtarbaev.
Bólim jetekshisiniń aıtýynsha, bıyl Salyq zańyna ózgertýler engizildi. Osylaısha, endi kólik salyǵyna qatysty buıryqtardy memlekettik kirister basqarmasy shyǵara alady. Keıin buıryq jeke sot oryndaýshysyna jiberiledi. Eger atalǵan sharalardan keıin kólik ıesi qaryzyn tólemese, memleketten shekara asý quqyǵynan aıyrylady. Buǵan qosa, júrgizýshi kýáligi alynýy múmkin. Sonymen qatar, bankterdegi esepshottar men kartaǵa shekteý qoıylady.
Aıta ketý kerek, búgin toqtatylǵan tórt jol talǵamaıtyn kólikterdiń bireýinde qaryzy bar bolyp shyqty. Ol 2017 jyly kóligin esepke turǵyzǵan kezde salyq tólemegen. 60 myń teńge qaryzyn japqanǵa deıin júrgizýshiniń kóligi aıyppul turaǵyna qoıylatyn boldy.
«Bir toqsan ishinde aıyppul turaǵyna 10-nan 15-ke deıin avtokólik qoıylady, - dedi Maqsat Qantarbaev. «Jyl basynan beri turaqqa eki mıllıon teńge qaryzy bar bes tulpar jiberildi. Búgingi kúnge olardyń qaryzy ótelgen. Bes myńnan asa júrgizýshige eskertý jiberildi. Jalpy, avtokólik ıeleri memleketke 670 mıllıon teńge qaryz».
Reıdterdiń negizgi bóligi «Aq Otaý» meıramhanasynyń janynda, «Ertis» baqylaý-ótkizý pýnkti jáne Ýspen kópiriniń qasynda júrgiziledi. Dese de, qala joldarynda ornalasqan beınebaqylaý kameralary da bul iste kómegin beredi.
Aıta keterligi, ótken jyly jeltoqsan aıynyń basynda 1,6 mıllıon teńge qaryzy bar «Leksýs» kóligi aıyppul turaǵyna qoıylǵan bolatyn. 2017 jyly tórt mıllıon teńge salyq tólemegen toǵyz kólik turaqqa jiberildi.
