Pavlodarlyq jas mamandarǵa úı salý úshin bıýdjettik nesıe berildi
ASTANA. QazAqparat - Pavlodar aýdany prokýratýrasynyń usynysy boıynsha bilim berý salasyndaǵy mamandarǵa 6 mln teńgeden astam somaǵa turǵyn úı satyp alýǵa nesıe berildi, dep habarlaıdy pavlodarnews.
Bul týraly Pavlodar oblystyq prokýratýrasynyń apparaty habarlady. Aýdandyq prokýratýra densaýlyq saqtaý jáne bilim berý salalarynyń mamandaryna usynylatyn áleýmettik qoldaý kórsetý sharalaryn taldaý barysynda jergilikti atqarýshy organ tarapynan atalǵan mamandarǵa qoldaý kórsetpeý faktisi anyqtaldy. Qabyldanǵan sharalar nátıjesinde agroónerkásiptik keshen salasyndaǵy mamanǵa 3,4 mln teńge kólemindegi bıýdjettik nesıe berildi, bilim berý salasyndaǵy eki mamanǵa 6,8 mln.teńge somasyna turǵyn úı satyp alýǵa nesıe bólindi.
Jalpy orta bilim berý mektepteriniń 12 muǵalimine 1,9 mln teńge bolatyn birjolǵy kóterme járdemaqy bólindi. Pavlodar aýdanynyń prokýrory Kárim Shuǵaev densaýlyq saqtaý salasynda jyljymaıtyn múlik obektilerin salýǵa nemese satyp alýǵa bıýdjet qarajatyn bólýdi usyndy. Sondaı-aq, baspana alý kezeginde turǵandar úshin kommýnaldyq turǵyn úı qorynan jyljymaıtyn múlik qurylysyn uıymdastyrý máselesin qarastyrý týraly óz pikirin bildirdi.
