Pavlodarlyq jaraly japalaqty qanatyna sym taǵyp qutqardy
ASTANA. QazAqparat - «Serdtsa Pavlodara» qoǵamdyq qory qanaty synǵan japalaqty qutqardy, dep habarlaıdy pavlodarnews.
Jaraly qusty taýyp alǵan Kachır aýdanynyń turǵyny birden «Serdtsa Pavlodara» qoǵamdyq qorymen baılanysqa shyqqan. Keıin japalaqty Pavlodardaǵy veterınarlyq klınıkalardyń birine teksertip, qanatyna sym taǵyp, ota jasaǵan. Ota sátti ótti.
«Qusty Fıl dep atadyq. Onyń kólemi kógershinmen birdeı. Jýyq arada Novosibirdegi jyrtqysh qustardyń arnaıy ońaltý ortalyǵymen habarlasamyn. Fıl qazirgi ýaqytta jaqsaryp qaldy», - deıdi «Serdtsa Pavlodara» qoǵamdyq qorynyń tóraıymy Marııa Grebenkına.
Aıta keteıik, «Serdtsa Pavlodara» qoǵamdyq birlestiginiń bul alǵashqy qutqarǵan qusy emes. Ótken jyldyń qyrkúıeginde qor qyzmetkerleri jas búrkitti taýyp alǵan. Jaraqaty bolǵan búrkitti keıin jergilikti búrkitshiler alyp ketken.
