Pavlodarlyq ustazdar QR Prezıdentiniń alǵys hatymen marapattaldy
PAVLODAR. QazAqparat – Pavlodar oblysynyń úzdik ustazdary Prezıdent Qasym-Jomart Toqaevtyń alǵys hatymen marapattaldy. Pedagogtarǵa marapatty Pavlodar oblysynyń ákimi Bolat Baqaýov tabystady. Bul týraly QazAqparat aımaq ákiminiń resmı saıtyna silteme jasap habarlaıdy.
Atap aıtqanda, muǵalimderdiń kásibı merekesine oraı №2 Ertis orta mektebiniń bastaýysh synyp munalimi Janat Kamalova, Baıanaýyl aýdany Q. Sátbaev atyndaǵy oqý-tárbıe kesheniniń tarıh muǵalimi Qaırıden Muzafarov, Tereńkól aýdanynyń Q. Ospanova atyndaǵy №3 qazaq orta mektebiniń orys tili men ádebıeti pániniń muǵalimi Qusnı Ismaılova, Pavlodar aýdany Shaqat orta mektebiniń bıologııa muǵalimi Saǵyntaı Smaıylov jáne Ekibastuz qalasynyń S. Toraıǵyrov atyndaǵy №22 mektep-gımnazııasynyń qazaq tili men ádebıeti pániniń muǵalimi Kúlbarshyn Seıitova Memleket basshysynyń atynan alǵys hat aldy.
«Men 34 jyl boıy orys tili men ádebıetinen sabaq berip kelemin. Oqýshylarym kóptegen zııatkerlik saıystar men olımpıadalarda top jaryp júr. Eńbegimniń osynadaı joǵary deńgeıde eskerilgeni qýantady», - deıdi Qusnı Ismaılova.
Ustazdardy marapattarymen quttyqtaǵan aımaq basshysy: «Bar eńbegin shákirtine arnaǵan bizdiń ustazdardy maqtan tutamyn. Balalarǵa bilim berip, qorshaǵan ortamen tanystyrý úshin belgili dárejedegi daǵdylarmen qatar asa zor talant ıesi bolý kerek. Bizdiń óńirimiz bolashaqta da aldyńǵy qatarlardan kórinedi dep senemin», - dep atap ótti.
