Pavlodarlyq ustazdar qazaqsha hokkeı oılap tapty
PAVLODAR. QazAqparat - Pavlodardaǵy Nazarbaev Zııatkerlik mektebiniń muǵalimderi qazaqsha hokkeı oılap tapty. Erejeleri qazaqtyń ulttyq qazan oıyny negizinde jasaldy, dep habarlaıdy QazAqparat pavlodarnews.kz saıtyna siltememen.
Oıyn avtorlarynyń biri – hımııa-bıologııalyq baǵytyndaǵy NZM-niń dene shynyqtyrý páni muǵalimi Serik Temirǵalıevtiń aıtýynsha, QAZ-HOK, ıaǵnı qazaqsha hokkeı erejeleri ártúrli tarıhı qujattardy zertteı otyryp ázirlendi. Sporttyq oıynǵa avtorlyq kýáligi berildi.
«Qazaqtarda ertede qorǵanys pen shabýyl tásilderi pysyqtalatyn qazan oıyny bolǵan. Áriptes-pedagogtar Bolat Muqyshev pen Danııar Nurǵalıevpen birlese bul oıynnyń erejelerin qazirgi zamanǵa laıyq etip ózgerttik. Oıyn erejeleri Qazaqstan Respýblıkasy Ulttyq zııatkerlik menshik ınstıtýtynda saraptamadan ótti», - deıdi Serik Temirǵalıev.
QAZ-HOK-ta bes-besten bólingen eki komanda dopty taıaqpen qazanǵa tıgizýi shart. Osy arqyly oıyn dopty hokkeıge uqsaıdy. Doptyń dıametri 7,6 sm.
«Alańnyń eki jaǵyndaǵy 1,8 metrlik sheńber ortasyna 50h40 santımetrlik kóp qyrly «qazan» qoıylady. Árbir komanda shabýylǵa berilgen 5 mınýt ishinde dopty qazanǵa tıgizýi kerek. Qorǵanǵan komanda qazan aınalasyndaǵy sheńber ishine kirmeýi tıis. Bes mınýt aıaqtalǵanda shabýyl quqyǵy qarsylas komandaǵa beriledi», - deıdi pedagog.
Kez kelgen sport túrinde tárizdi munda da ereje buzǵan komandaǵa jaza taǵaıyndalady. Dopty aıaqpen oınaǵan komandaǵa býllıt sekildi alań ortasynan erkin soqqy baǵyttalady. Balaǵat sóz aıtqan nemese tóreshi sheshimimen kelispegen oıynshy 2 mınýtqa alańnan qýylady.
Serik Temirǵalıevtiń sózine qaraǵanda, «Rýhanı jańǵyrý» baǵdarlamasy aıasynda jasap shyǵarylǵan bul oıyn mektepterde ótkizýge usynylady. Qazaqsha hokkeı jastardy eptilikke, ujymda birlese qımyldaýǵa úıretedi. Nazarbaev Zııatkerlik mektebinde qala men oblystyń jalpy bilim beretin mektepteriniń dene shynyqtyrý muǵalimderine oıyn erejeleri men erekshelikteri tanystyryldy. Aldaǵy ýaqytta atalǵan sporttyq oıynnan qala mektepteri arasynda jarys ótkizý josparlanýda.
