Pavlodarlyq úsh balanyń anasyn sýıtsıdten qutqaryp qaldy
NUR-SULTAN. QazAqparat – Áıel Ertis ózeniniń kópirinen sekirmek bolǵan, dep habarlaıdy QazAqparat tilshisi oblystyq Polıtsııa departamentine silteme jasap.
30 qazan kúni saǵat 17.35-te «Aqjol» baqylaý pýnktine Baýyrjan Máýlimbergenov atty júrgizýshi habarlasyp, belgisiz áıeldiń kópirden sekirmek bolǵanyn aıtqan.
«Qalaǵa qaraı bettep bara jatqan kezde kópirden sekirmek bolǵan áıeldi baıqap qaldym. Ol sál artqa shegindi de, kúrtesin sheshe bastady. Oıyn birden túsinip, oǵan júgire jóneldim. Jete bergenimde áıel kópirdiń súıenishinde otyryp, sekirýge shaq qaldy. Birer sekýndtyń ishinde artynan júgirip kelip, moınynan qysyp, jerge túsirdim. Odan alkogol ıisi sezildi. Áıel jylap, ómiriniń qıyndyǵyna, bárinen sharshaǵanyna shaǵymdandy. Shamam kelgenshe ony sabyrǵa shaqyryp, sodan keıin polıtsııa qyzmetkerleriniń qolyna tapsyryp, úıime kettim», - deıdi óz sózinde Baýyrjan.
Osylaısha, Pavlodar turǵynynyń adamgershiligi adam ómirin qutqaryp qaldy.
Keıin 30 jastaǵy áıeldiń kámeletke tolmaǵan 3 balasy bary anyqtaldy. Sol kúni óz týystarymen urysysyp qalyp, óz-ózine qol jumsamaqshy bolǵan.
45 jastaǵy Baýyrjan Máýlimbergenov ózin batyr dep sanamaıtynyn aıtady. «Meniń ornymda bári osylaı isteıtin edi» deıdi.
Polıtsııa departamentiniń basshylyǵy úsh balanyń anasyn qutqarǵan jigitti marapattaǵaly jatyr.
