Pavlodarlyq turǵynnyń qos búıregi úsh adamnyń ómirin qutqaryp qaldy

Ómirden ótkennen keıin donor bolǵan  azamattyń mýltıorgandaryn alý № 1 qalalyq aýrýhanada júrgizildi, dep habarlaıdy pavlodarnews.kz .

  Ol 18 qazanda  aýyr bas mı jaraqatymen  jetkizilgen. Eki kún ótkennen keıin dárigerler naýqastyń  mıy tirshilik belgisin toqtatqanyn tirkegen.    - Qaıtys bolǵan adamnyń joldasymen jáne ákesimen sóılestik,  - deıdi № 1 qalalyq aýrýhananyń bas dárigeriniń orynbasary Almas Jumabekov. - Olar Aqtaýdan arnaıy kelgen. Týystarynyń kelisiminen keıin 21 qazan kúni Pavlodarǵa astanalyq  emhanadan dárigerler brıgadasy jetti. Sol kúni birden retsepıentterge  aǵzalar ornalastyryldy. Donorlyq eki búırek eki ul balaǵa, baýyry 30 jastaǵy er adamǵa berildi. Retsepıentter Jambyl jáne Aqmola oblystarynan. Aq jeleńdilerdiń aıtýynsha, donordyń júregi men ókpesi de transplantatsııaǵa  jaramdy bolǵan. Degenmen eki kúnge sozylǵan kúrdeli ota alynǵan aǵzalardyń qabiletsizdigine ákelip, dárigerlerdiń eńbegi zaıa keter edi.  
 
  - Ádette, otadan keıin barlyǵy belgili bolady. Bul jaǵdaıda aǵzanyń organdardy qabyldamaýy baıqalmady. Sondyqtan  jaqsy bolar degen oıdamyz, - deıdi Pavlodar oblysy transplantologııa boıynsha óńirlik úılestirýshi Dmıtrıı Poterebýh.  Búgingi kúni elimizde 3517 adam azǵasyn aýystyrýǵa muqtajdardyń tiziminde tur. Ertis óńirinde olardyń sany - 89 adam.