Pavlodarlyq turǵyn zańsyz qurylystyń kesirinen kún sáýlesin kórmeı otyr
ASTANA. QazAqparat - Pavlodar qalasynyń turǵyny Svetlana Isakanova óz úıinde kún sáýlesin kórmeı otyr, dep habarlaıdy pavlodarnews.kz.
- «Jaıaý Musa, 1» mekenjaıynda ornalasqan páterim bar. Meniń ruqsatymsyz "Suńqar" dúkeniniń janynan qurylys júrgizilýde. Qazirgi tańda tabıǵı jaryqty kórýden qaldyq. Álbette, qarańǵylyq basqan baspanamdy saýdaǵa qoıý nemese aýystyrý da múmkin bolmaı otyr. Ótken jyly qyrkúıek aıynda qurylys bólimine júgingen bolatynmyn. Degenmen, másele sheshimin tappady. Zańsyz qurylys júrgizgen adamdy taba almaǵandyqtan, isti jaýyp tastaǵan. Endi qaıtadan qolǵa alýǵa ýáde berýde. Búgin "Nur Otan" partııasynyń oblystyq fılıalynda qabyldaýda boldym, - deıdi Svetlana Isakanova.
Pavlodar qalasy memlekettik sáýlet jáne qurylysty baqylaý bólimi usynǵan hattyń jaýabyna súıensek, atalmysh nysannyń qurylysyn salýǵa jergilikti atqarýshy organ tarapynan eshbir ruqsat qaǵazdary berilmegen. "Suńqar" dúkenine qosalqy qurylys turǵyzý boıynsha jobalyq-smetalyq qujattama alý boıynsha kelisim júrgizilmegen.
Zań talaptaryn buza otyryp salynǵan qurylys turǵyn úıge tabıǵı jaryqtyń túsýine kedergi bolýmen qatar, órt qaýipsizdigi erejesi men syrtqy kórinisti buzýda.
Aıta keterligi, Svetlana Isakanova "Suńqar" dúkeniniń ıesi Sulýshash Qaıyrbaevaǵa advokatynyń atynan daýdy sotqa deıingi retteý týraly hat joldaǵan. Ázirge nátıjesiz. Ol óziniń bul talaby qanaǵattandyrylmaǵan jaǵdaıda zańsyz turǵyzylǵan qurylysty buzý týraly aryzben sotqa júginýdi kózdep otyr.
