Pavlodarlyq tótenshelikter 1,5 myńǵa jýyq balaǵa sýda júzýdi úıretti
ASTANA. QazAqparat - Pavlodar oblystyq tótenshe jaǵdaılar jónindegi departamentiniń mamandary oblystyq bilim berý basqarmasymen birlesip, 1,5 myńǵa jýyq oqýshyny sýda júzýge úıretti.
Bul týraly búgin oblystyq tótenshe jaǵdaılar jónindegi departamentiniń bastyǵy Álibek Dlımov óńirlik kommýnıkatsııalar qyzmetinde ótken brıfıngde aıtty, dep habarlaıdy pavlodarnews.kz .
«Shomylý maýsymyna daıyndyq sharalaryn kóbinde jasóspirimder arasynda júrgizemiz. Aǵymdaǵy jyldyń basynan beri oblystyq tótenshe jaǵdaılar jónindegi departament janyndaǵy sýdan qutqarý jasaǵynyń mamandary oblystyq bilim berý basqarmasymen birge qala jáne aýdandardaǵy ashyq haýyzdarda qaýipsizdik sharalaryn túsindire otyryp, 1496 balany daıyndyqtan ótkizdi. Sonymen qatar, 19 myńnan astam oqýshyny qamtyp, 8 ınteratıvtik sabaq uıymdastyryldy. Odan bólek 17 myńnan astam oqýshyǵa tótenshe jaǵdaıdyń aldyn alýǵa baǵyttalǵan dáris ótkizildi. Jalpy, mundaı sharalar óz nátıjesin berip jatyr. Ásirese, sýda júze almaıtyn jasóspirimder úshin munyń paıdasy zor. Demalys maýsymy jaqyndaǵan saıyn qatysýshylar sany artty», - deıdi Álibek Dlımov.
Departament bastyǵynyń sózinshe, sýdaǵy qaýipsizdikti saqtaýdy túsindirý maqsatynda 20-dan astam aktsııa men fleshmovtar uıymdastyrylyp, telearnalar men radıolardan habarlandyrýlar berilgen. - Budan keıin kámelettik jasqa tolmaǵan balalar úshin ata-analar jaýap beretin bolady. Máselen, jergilikti polıtsııa qyzmetiniń ókilderimen birge reıd júrgize otyryp, sonyń negizinde balalaryn sýǵa jalǵyz jibergen jáne sýly jerlerde jalǵyz qaldyrǵan ata-analar ákimshilik jaýapkershilikke tartylady, - deıdi ol.
