Pavlodarlyq tórt jasar bala úsh táýlik boıy shuńqyrda jatqan
PAVLODAR. QazAqparat - Pavlodarlyq úsh jasar Artýr óziniń tórtke tolǵan týǵan kúnin shuńqyrda qarsy aldy, dep habarlaıdy «QazAqparat» HAA tilshisi.
Ol birneshe kún boıy nár tatpaǵan jáne qatty salqyn tıgen, dedi búgin oblystyq balalar aýrýhanasynda. Balaǵa qajetti medıtsınalyq kómek kórsetilýde.
Kishkentaı Artýr ata-anasynsyz dalada júrgen. Pavlodar oblystyq ishki ister departamentiniń aqparaty boıynsha, onyń anasy bul ýaqytta alkogoldik ishimdik ishken. Búldirshin qala syrtyndaǵy tereń shuńqyrǵa túsip ketip, shyǵa almaǵan. Polıtsııa, kınologtar men 5512 áskerı bóliminiń áskerı qyzmetshileri ony tek búgin, tańǵy saǵat toǵyzda tapty. Bala keshe tereń shuńqyrda bolǵan kezinde tórt jasqa toldy.
Balanyń joǵalǵany týraly keshe saǵat 21:00-de búldirshinniń ógeı ákesi - anasynyń birge turatyn joldasy habarlaǵan. Artýrdy izdeýge barlyq kúsh tartyldy. Ony tańǵy saǵat toǵyzda áskerı-tehnıkalyq mekteptik avtodromyndaǵy shuńqyrdan taýyp, aýrýhanaǵa jetkizdi.
«Qazirgi tańda balanyń 46 jastaǵy anasyna qatysty QR Ákimshilik kodeksiniń 127-baby «Balany tárbıeleý boıynsha mindetterdi oryndamaý» boıynsha ákimshilik hattama toltyryldy. Sondaı-aq, QR QK 140-baby «Kámeletke tolmaǵan adamdy tárbıeleý jónindegi mindetterdi oryndamaý» boıynsha qylmystyq isti qozǵaý máselesi sheshilýde. Sonymen qatar, ony ata-ana quqyǵynan aıyrý týraly materıal toltyrylyp, kámeletke tolmaǵandar isi jónindegi komıssııanyń qaraýyna jiberiledi», - dedi ІІD baspasóz hatshysy Baıan Maǵzumova.
