Pavlodarlyq taýar óndirýshiler Astanaǵa 758 tonnadan astam ónim jetkizedi
ASTANA. QazAqparat - Astanada 24-25 qyrkúıek kúnderi ótetin aýylsharýashylyǵy jármeńkesine Pavlodar oblysynyń 79 taýar óndirýshisi men kásiporny 758,3 tonna ónim jetkizedi, dep habarlaıdy pavlodarnews.kz.
Oblys ákimi baspasóz qyzmetiniń aqparatyna súıensek, jármeńke "Han Shatyr" saýda oıyn-saýyq ortalyǵynda ótedi. Óńir fermerleri 90 tonna et jáne et ónimin, 300 tonna kartop, 140 tonna kókónis pen 150 tonna basqa da ónim usynady. Budan basqa, "Qazaq taǵamdary" ashanasynyń ulttyq ónimderi men Ertis óńiri qolónershileriniń buıymdary saýdalanady. Sondaı-aq, ulttyq sport túrinen jarystar men kontserttik baǵdarlama ótedi.
Aıta keterligi, pavlodarlyq aýyl sharýashylyǵy taýar óndirýshileriniń ónimi astanalyqtardyń tarapynan zor suranysqa ıe.
