Pavlodarlyq stýdent Qazaqstannyń kıeli oryndarynyń barelefterin salyp júr
Janattyń oıyna osy bıznes ıdeıa mektep qabyrǵasynda oqyp júrgende kelgen, al Jastar korpýsy jobasynan utyp alǵan grant ony iske asyrýǵa múmkindik berdi.
«Bala kúnimde-aq kásipker bolýdy armandaýshy edim. 11-synypta oqyp júrgende «Atameken» UKP ótkizgen kásipkerlik kýrstaryna jazyldym. Ári ony bitirgen az ǵana adamnyń biri boldym. Aqyr sońynda bıznes jospar oılap tabý qajet boldy. Men balalarǵa baılanysty bıznes qurý qajettigin bilýshi edim, óıtkeni, kásipkerlik turǵysynan alǵanda, bul táýir tabystyń kózi», - deıdi Janat.
Kýrstarǵa qatysyp júrip Janat QR Bilim jáne ǵylym mınıstrligi Búnıejúzilik bankpen yntymaqtastyqta 2017 jyldan beri iske asyryp kele jatqan Zhas Project jobasynan habar alady. Ol dostaryn ózine qosylýǵa shaqyryp, birge grant bólinetin konkýrsqa ótinish tapsyrady.
Olar gıpsten barelefter ázirleýge qajetti toptamalardy jasaýǵa sheshim qabyldaıdy. Mundaı barelefterdi jasaý kez kelgen balanyń demalysyn mazmundy etedi ári balalardyń eńbek daǵdylaryn jetildirip, qııalyn damytady, qol-aıaǵyn shynyqtyrady.
Janat qazirde kompıýterdiń kómegimen Soltústik Qazaqstandaǵy kıeli oryndardyń, qazaq halyq aýyz ádebıeti keıipkerleriniń barelefteriniń maketterin jasap júr. Maket daıyn bolǵan soń frezerlik stanokta aǵash matrıtsalardy ázirlep, pishinderin jasaıdy. 
Jastar korpýsyn damytý jobasy aıasynda Janat dostarymen birge balalar úıiniń tárbıelenýshilerine, erekshe kútýdi qajet etetin balalarǵa arnap 500-den astam toptama ázirlep úlgerdi. Jýyrda barelefterdiń taqyryp aıasyn keńeıtýdi de josparlap otyr ári qaladaǵy keńse taýarlaryn satatyn dúkendermen yntymaqtastyq ornatpaq. 
Janat Kákimovtiń jobasy Jastar korpýsyn damytý jobasyndaǵy úzdik bıznes josparlardyń biri dep tanyldy. Onyń jumystary bıyl aqpan aıynda Astanada ótken úzdik tájirıbeler respýblıkalyq forýmynyń kórmesine qoıyldy.
Zhas Project jobasy týraly tolyǵyraq myna jerden bilýge bolady.
