Pavlodarlyq Sheshenstandaǵy WFCA jekpe-jek týrnırinde jeńiske jetti
PAVLODAR. QazAqparat - «Ahmat-Pavlodar» jekpe-jek klýbynyń tárbıelenýshisi Fanıl Rafıkov Groznyı qalasyndaǵy 44-týrnırdiń mańyzdy aıqasynda jeńiske jetti, dep habarlaıdy «QazAqparat» HAA tilshisi.
«Bul onyń qatarynan qol jetkizgen segizinshi jeńisi. Ol daǵystandyq Arsen Ýbaıdýlaevpen kúsh synasty. Bul jeńiske qıyndyqpen qol jetkizdi, sebebi buǵan deıin bizdiń jerlesimiz daıyndyqta bolyp, eki aı boıy Groznyıdaǵy «Ahmat» klýbynyń bazasynda turdy», - dedi «Ahmat-Pavlodar» jekpe-jek klýbynyń press-attashesi Artem Býlanov.
Aıqas kezinde daǵystandyq kúres mektebiniń ókili A. Ýbaıdýlaev 15 mınýt boıy shabýyl jasaǵan. Biraq, pavlodarlyq onyń shabýylyna tótep berip qana qoımaı, qarsylasyna 50-den astam soqqy bergen. Úsh tóreshi de 30-28 esebimen qazaqstandyq sportshyny jeńimpaz dep tanydy.
Foto: «Ahmat» kásibı sport klýby.
