Pavlodarlyq sheneýnik bıýjetti únemdeý áreketin túsindire almady
ASTANA. QazAqparat - Pavlodar qalalyq turǵyn úı kommýnaldyq sharýashylyq (TÚKSh) bóliminiń basshysy Zikrııa Sultanǵazınov qala ákimi Nurjan Áshimbetovke qandaı da bir maqsatta bıýdjetten bólingen qarjyny nelikten qaıtaryp otyrǵanyn túsindire almady, dep habarlaıdy pavlodarnews.kz.
Eske sala keteıik, ótken joly TÚKSh bóliminiń basshysy Zikrııa Sultanǵazınov qala ákiminen óziniń qyzmetkerleri PIK tóraǵalaryna apattyq jaǵdaıda turǵan aǵashtardy kesýge qarjy qarastyrylmaǵanyn aıtqany úshin synnyń astynda qalǵan. Bul joly TÚKSh bóliminiń basshysy oblys ortalyǵyndaǵy qorshaýlardy qalypqa keltirýge bólingen 15 mln teńgeni únemdep, bıýdjetke keri qaıtarýdy jón kórgen.
«Qarap otyrsaq, bıýdjetten 50 mıllıon teńge merdigerlerdiń qala boıynsha qorshaýdardyń jyrtyǵyn jamaýy úshin bólgenbiz, - dedi Nurjan Áshimbetov. - Bıýdjetti naqtylaǵan kezde 15 mıllıondy alyp tastamaqsyz ba? Onyń mánisi nede? Biz sizderge tesikterdi jabýǵa aqsha beremiz, al siz: «Budan keıin qarjy qajet emes» deısiz. Merdigerler bar, beton, metall jáne dekoratıvti qorshaýlar bekitildi. Sizdiń mindet - merdigerge tapsyrma berý. Qarjydan bas tartpańyz. Hatyńyzdy qaıtaryp alyńyz. Úlken áriptermen jazyp qoıyńyz, únemi umytyp qalasyz. Nesi qıyn sonshalyqty? Merdigerge aıtyńyz, jumys jasaı bersin. Metr boıy 16 myń teńge. Bul artyq aqsha ma?»
Pavlodar qalasy ákiminiń aıtýynsha, bıýdjet esebinen qalanyń ótpeli kóshelerinde qorshaýlar aýystyrylady. (Qorshaýdan 20 sm jerlerde qala aýmaǵy bastalatyn bolsa) bul jeke qorshaýlardy da qamtıdy. Mundaı tájirıbe kóptegen qalalarda qoldanylady. Adamdardyń barlyǵynyń qorshaýlardy óz esebinen retke keltirýge shamalary jete bermeıdi. Degenmen tesik, tozyǵy jetken qorshaýlar oblys ortalyǵynyń ımıdjine nusqan keltiredi.
