Pavlodarlyq sheneýnik Álıhan Bókeıhannyń bıýstin kedergisiz qabyldaý úshin para alǵan

PAVLODAR. QazAqparat - Pavlodar oblystyq mádenıet basqarmasynyń basshysyna qatysty sot úkimi shyqty. Sotqa deıingi tergeýdi sybaılas jemqorlyqqa qarsy qyzmet júrgizdi, dep habarlaıdy QazAqparat.

Kásipkerden para aldy degen kúdikke ilingen mádenıet, tilderdi damytý jáne muraǵat isi basqarmasynyń basshysy kinásin moıyndady.

2022 jylǵy 9 maýsymda Samal Begalınova JK basshysynan shart jasasqany úshin 1 mln teńge para alǵan. Kompanııa Pavlodar mektebine Álıhan Bókeıhanovtyń bıýstin daıyndaıtyn bolǵan jáne ony kedergisiz qakbyldaýǵa kelisken.

«Sot Samal Begalınovany QK-tiń 366-babynyń 2-bóligi boıynsha qylmystyq quqyq buzýshylyq jasaǵany úshin kináli dep tanydy jáne oǵan úsh jyl merzimge bas bostandyǵynan aıyrý túrinde jaza taǵaıyndady. Sondaı-aq, múlkin – sybaılas jemqorlyqqa qarsy komıtettiń oblystyq departamentiniń zattaı dáleldemelerdi saqtaý kamerasynda turǵan mıllıon teńgeni tárkileý týraly úkim shyǵardy», - dep habarlady №2 Pavlodar sotynyń sýdıasy Ásemqońyr Saıran.

Sonymen qatar, ol endi ómir boıy memlekettik qyzmette, jergilikti ózin-ózi basqarý organdarynda, sondaı-aq Qazaqstannyń Ulttyq Banki men onyń vedomstvolarynda qyzmet atqarý quqyǵynan aıyryldy.

Sottalǵan adamnyń ózi jalǵyz tárbıelep otyrǵan eki jas balasy (12 jáne 4 jastaǵy) bolýyna baılanysty bas bostandyǵynan aıyrý jazasyn óteý oǵan 5 jylǵa keıinge qaldyryldy (QK 74-babynyń 1-bóligi negizinde).

Ol jazasyn qaýipsizdigi ortasha qylmystyq-atqarý júıesi mekemesinde óteıtin bolady.

Minez-qulqyn baqylaý turǵylyqty jeri boıynsha probatsııa qyzmetine júkteldi.

Úkim zańdy kúshine engen joq.