Pavlodarlyq polıtseıler urlanǵan kólikti májbúrlep toqtatty
ASTANA. QazAqparat - Pavlodarlyq tártip saqshylary «Toyota Carina» avtokóligin tizgindep ketken júrgizýshini áreń toqtatty. Pármenge qulaq aspaǵan kólik júrgizýshisin tártip saqshylaryna kóligimen soqtyǵysý arqyly toqtatýǵa týra keldi, dep habarlaıdy QazAqparat» HAA tilshisi Pavlodar oblystyq ІІD baspasóz qyzmetine silteme jasap.
Vedomstvonyń habarlaýynsha, oqıǵa 3 jeltoqsanda tirkelgen. Pavlodar qalasyndaǵy ІІB-nyń «102» nómirine Sátbaev kóshesindegi úılerdiń biriniń aýlasynan «Toyota Carina» avtokóliginiń urlanǵany týraly habarlama kelip túsken. Quqyq qorǵaýshylar birden urlanǵan avtokólikti izdeýge kirisken.
«Tıisti habarlamany alǵannan keıin 636 jol-patrýldik batalonynyń polıtsııa patrýli izdeý jarııalanǵan avtokólikti kórip qalǵan. Toıota asa joǵary jyldamdyqpen kele jatqannan keıin tártip saqshylary ony birden toqtatý sharalaryn qolǵa alǵan. Alaıda kóliktiń júrgizýshisi «toqta» degen pármendi elemeı, qozǵalysty jalǵastyra bergen. Polıtsııa ekıpajy onyń sońyna túsip, joǵary daýysty baılanyspen jáne jaryq sıgnalymen birneshe ret toqtaý týraly pármendi qaıtalaǵan», - delingen habarlamada.
Polıtsııanyń eskertýine qaramastan avtokólik júrgizýshisi joǵary jyldamdyqty báseńdetpeı, adamdardyń ómirine qaýip tóndirip, jaǵdaıdy ýshyqtara túsken.
«Teplov-Sátbaev kósheleriniń qıylysynda quramynda polıtsııa serjanttary Nurbek Únderim men Rýslan Zeınollınov bolǵan 631 avtopatrýl júıtkip bara jatqan kólikti kórip qalyp, májbúrli túrde toqtatýǵa sheshim qabyldap, oǵan soqtyǵysqan. Polıtsııa kóligimen soqtyǵysqannan keıin ǵana kólik júrgizýshi toqtaǵan», - deıdi ІІD baspasóz qyzmeti.
«Toyota Carina» avtokóligin urlap tizgindep ketken oblys ortalyǵynyń 27 jastaǵy turǵyny ýaqytsha oqshaýlaǵyshqa qamaldy. Tekserý kezinde dárigerler onyń ortasha deńgeıde mas bolǵanyn anyqtaǵan.
Kúdiktige qatysty QR QK-niń 200-baby 1-bóligi (kólik urlaý) men 346-baby boıynsha sotqa deıingi tergeý amaldary bastaldy. 
