Pavlodarlyq polıtseıler órtengen úıden aýyl turǵynyn alyp shyqty
ASTANA. QazAqparat - Qashyr aýdany Tereńkól aýylynda polıtsııa qyzmetkerleri órtenip jatqan úıden ózdigimen júre almaıtyn er adamdy alyp shyqty, dep habarlaıdy QazAqparat tilshisi.
Pavlodar oblysy Polıtsııa departamentiniń VKontakte paraqshasynda jarııalanǵandaı, túngi saǵat 02.16 shamasynda kezekshi bólimge kórshi úıdiń órtenip jatqany týraly jedel habarlama túsken. Quqyq qorǵaýshylar shuǵyl tótenshe qyzmetke habar berip, avtopatrýlmen oqıǵa ornyna kelgen.
«Tártip saqshylary úıde ózdigimen júre almaıtyn múgedek er adamdy alyp shyqty. Úıdiń shatyrynda qoıý tútin aralasqan kúıde ot shyǵyp jatty. Jaǵdaıdy jyldam baǵdarlap, ýaqytty joǵaltpaǵan polıtsııa aǵa serjanty Marýf Mansurov pen polıtsııa kishi serjanty Áset Abdyqanov syrtqy esiktiń ilmeli qulpyn buzyp, ishke kirgen», - delingen habarlamada.
Tártip saqshylary úıge kirgen kezde tútin arasynda demalý qıynǵa túsipti. Onyń ústine úıdiń qabyrǵasy janyp jatqan. Tútinnen túk kórinbese de, tártip saqshylary qarańǵyda qonaq bólmede es-tússiz jatqan er adamdy anyqtaıdy. Polıtsııa qyzmetkerleri aqyry er adamdy dalaǵa alyp shyǵyp, jedel járdem kelgenshe kórpemen jyly ustaǵan. Osydan keıin jedel járdem zardap shekken er adamdy aýrýhanaǵa jetkizgen.
«Órt kezindegi batyl is-áreketteri úshin Qashyr aýdany polıtsııa bólimisinń polıtsııa qyzmetkerleri jol-patrýldik polıtsııa tobynyń polıtseıi polıtsııa aǵa serjanty Marýf Mansurov pen kishi serjant Áset Abdyqanov Pavlodar oblysy Polıtsııa departamenti bastyǵy polıtsııa general-maıory Áýbákirov Amantaı Akramulynyń buıryǵymen kótermelenetin bolady», - dep habarlaıdy oblystyq Polıtsııa departamentinen.
