Pavlodarlyq polıtseıler mastardy úılerine deıin jetkizip salady
ASTANA. qazAqparat - Pavlodarda Іshki ister departamentiniń qyzmetkerleri mas adamdardy keıde úılerine deıin jetkizip tastaıdy.
Bul týraly halyq aldynda birinshi jarty jyldyq boıynsha esep berý kezdesýinde oblystyq ІІD bastyǵy, polıtsııa general-maıory Marat Qojaev aıtty, dep habarlaıdy pavlodarnews.kz .
«Maıqaıyń aýylynda 10 myńnan astam adam turady. Bizdiń óńirde Qazaqstannyń birneshe iri kásiporyndary ornalasqan. Aýylda basqa aımaqtardyń 900-deı turǵyny bar. Ár kesh saıyn aýyl kóshelerinde mas adamdar kóp júredi. Aıyqtyrǵysh joq, eń jaqyn degen medıtsınalyq aıyqtyrǵysh Ekibastuz qalasynda ǵana. Aýdan ortylyǵynda aıyqtyrǵysh joq. Bul máseleni qalaı sheshýge bolady?», - dedi Baıanaýyl aýdany Maıqaıyń aýylynyń turǵyny.
Óz kezeginde Marat Qojaev alkogolge áýestik barlyq óńirlerdiń problemasy ekendigin tilge tıek etti. - Bizdiń halyq demalys pen alkogoldi qatar alyp júredi, - dedi polıtsııa general-maıory. - Bizdiń óńirde Densaýlyq saqtaý mınıstrligine qaraıtyn úsh ýaqytsha beıimdelý ortalyǵy bar, olar Pavlodar, Ekibastuz, Aqsý qalalarynda. Jyl saıyn ákimniń qoldaýymen Baıanaýylda jazǵy ýaqytsha aıyqtyrǵyshtardy ashamyz. Maǵan kún saıyn 21 bólimsheden esep berip, barlyq aıyqtyrǵyshtardyń tolyp turǵanyn aıtady. Keıde, bizdiń qyzmetkerler mas adamdardy úılerine deıin jetkizip tastaıdy. Nemese, kelisimge kelip, mastardy úsh saǵattan artyq ustamaı úılerine jiberip, olardyń ornyna basqalaryn kirgizemiz. Budan soń ІІD bastyǵy Maıqaıyń aýylynyń aǵa ýchaskelik ınspektoryna aýyldaǵy jaǵdaıdy qalypqa keltirýdi tapsyrdy.
Oblystyq ІІD usynǵan aqparatqa súıensek, óńirde alkogoldi ishimdik saldarynan oryn alatyn oqys jaǵdaılar 7,2%-ǵa azaıǵanymen, óltirý faktisi 19-ǵa jetti, densaýlyqqa aýyr jaraqat keltirý - 62, zorlaý - 20, tonaý - 9, qaraqshylyq - 39, urlyq - 153, kólik urlaý - 15, alaıaqtyq - 7, buzaqylyq - 9 jaǵdaıǵa jetken. Ýaqytsha beıimdelý ortalyqtaryna 16497 adam kirse, 1971 adam ákimshilik quqyqbuzýshylyq boıynsha qamaýǵa alynǵan.
Foto: lada.kz
