Pavlodarlyq polıtseıler iri barymta qylmysyn ashty
PAVLODAR. QazAqparat - Pavlodar oblysynyń Sharbaqty aýdanyndaǵy tergeý amaldarynda polıtseıler eki iri mal urlyǵy qylmysyn ashty, dep habarlaıdy «QazAqparat» HAA tilshisi.
Barymtashylar sol eki istiń birinde 13 jylqy, ekinshisinde 10 jylqyny qoldy qylǵan, dep málimdedi Pavlodar oblystyq ishki ister departamentiniń baspasóz qyzmeti. Budan mal ıelerine jalpy tórt mıllıon teńge zııan keltirilgen. Kúdiktilerge qatysty Qazaqstan Respýblıkasy Qylmystyq kodeksiniń úsh baby boıynsha is ashyldy. Qylmysy dáleldense, olarǵa jeti jylǵa deıin bas bostandyǵynan aıyrý jazasy berilýi múmkin.
Buǵan deıin aýdanda 14 bas iri qara urlaǵan 35 jastaǵy pavlodarlyq pen Shyǵys Qazaqstan oblysynyń 46 jastaǵy turǵyny ustalǵan bolatyn. Polıtseılerdiń aıtýynsha, urlyqqa kóbinese mal ıeleriniń sharýaǵa salaqtyǵy sebep bolady. Malyn jaılaýǵa jiberip, qaraýsyz qaldyrady. Maly joǵalǵan kúnniń ózinde aldymen ózderi izdeýge kirisedi, tappaǵan soń ǵana polıtsııaǵa júginedi. Al bul urlanǵan maldy tabý múmkindikterin aıtarlyqtaı tómendetedi.
