Pavlodarlyq polıtseıler boranda qalǵan júz shaqty kólikke jaıaý júrip jol kórsetti

PAVLODAR. QazAqparat - Qar qursaýyna tap bolǵan aýyr júk kólikteri men jeńil avtokólikteriniń júrgizýshileri qozǵalysty jalǵastyra almaǵan soń keptelis paıda boldy, dep habarlaıdy QazAqparat Pavlodarnews.kz saıtyna silteme jasap.

Eske sala keteıik, óńirde birneshe kún boıy daýyldy eskertý jarııalanyp, respýblıkalyq tas joldar barlyq kólik túrleri úshin jabyldy. Alaıda eskertýdi elemesten jolǵa shyqqan birqatar júrgizýshiler jolda qalyp qoıdy. Olarǵa tártip saqshylary men qutqarýshylar kelip jetti.
Omby qalasynyń turǵyny Danııar Saǵyndyqovtyń aıtýynsha, 15 aqpanda Pavlodar – Nur-Sultan tasjolynda Tórt-Qudyq kentiniń mańynda júz shaqty aýyr júk kólikteri men jeńil kólikter kolonnasy jınalyp qalǵan.

- Alaı-dúleı boran soǵyp, aınalada túk kórinbeı ketti. Dál aldymyzda ne bolyp jatqany kórinbedi. Bir sátte barlyǵy turyp qaldy, sebebi alǵa jyljý múmkin emes edi, – dedi Danııar Saǵyndyqov.

Tabıǵattyń tosyn minezine tap bolǵan júrgizýshilerge kómekke pavlodarlyq polıtseıler Qýandyq Rahmetov pen Birjan Najımov keldi. Olar júrgizýshilerdi tynyshtandyryp, bes kólikti qar qursaýynan qazyp alyp shyǵýǵa kómektesti, tros paıdalanyp, kólikterdi shyǵardy.

«Polıtseılerdi biri kólikterdiń aldynda júrdi, al ekinshisi jaryqty qosty. Olar kórý aımaǵy paıda bolǵanǵa deıin osylaı júrdi. Polıtsııa qyzmetkerleri qar qursaýyna tap bolǵan júrgizýshilerge kómektesip, joldy kórsetti, – deıdi kólik ıesi Vıacheslav Vasılevıch.