Pavlodarlyq óziniń páterin ózi tonaǵan bolyp shyqty
PAVLODAR. QazAqparat - Býkmekerlik keńsede eki kúnniń ishinde 7 mln teńge utylǵan Pavlodar turǵyny óz páteriniń tonalǵanyn oıdan shyǵaryp, polıtsııa shaqyrǵan, dep habarlaıdy «QazAqparat» HAA tilshisi Pavlodar oblystyq ishki ister departamentine silteme jasap.
Polıtsııaǵa er adam habarlasyp, úıinen aqshasynyń urlanǵanyn habarlaǵan. Polıtseıler úıdi qarap shyǵyp, urlyqtyń izin tappady. Alaıda bólmelerdiń ishi shashylyp, shkaftardyń esikteri ashyq bolǵan jáne jıhazdar yǵystyrylǵan. Úı ıesiniń aıtýynsha, aqshadan basqa eshteńe urlanbaǵan. Tergeýshiler kórshilerden surastyryp, úıdiń mańyndaǵy ǵımarattardyń vıdeobaqylaý kameralaryn teksergen. Bul is QR QK 188-baby «Urlyq jasaý» boıynsha sotqa deıingi tergeýdiń biryńǵaı tirkelimine engizildi.
43 jastaǵy úı ıesi páterinde eshkim bolmaǵan kezde, belgisiz bireýler aqshasyn - jeti jarym mıllıon teńgesin urlaǵanyn habarlaǵan. Biraq polıtseıler isti ary qaraı tekserip, er adamnyń 15 jyldan beri qumar oıyndarǵa áýes ekenin anyqtaǵan.
Ol «urlyq jasalǵannan» bir kún buryn býkmekerlik keńselerdiń birinde úsh jarym mıllıon, al úıi tonalǵan kúni 12 myń dollar utylyp qalǵan.
Onyń barlyǵy býkmekerlik keńselerdegi vıdeokameralardaǵy taspasyna jazylǵan. Er adam kórsetilgen dálelderden keıin, jalǵan shaǵym túsirgenin moıyndady. Ol bul áreketi arqyly óziniń utylyp qalǵanyn týystarynan jasyrmaq bolǵan.
Oǵan qatysty QR QK 419-baby «Kórineý jalǵan sóz jetkizý» boıynsha sotqa deıingi tergeý bastaldy.
