Pavlodarlyq órt sóndirýshiler jalyn sharpyǵan ǵımarattan 31 ballondy alyp shyqty

ASTANA. QazAqparat - Pavlodarda tońazytý jáne jeldetý jabdyǵyn shyǵaratyn kásiporynnyń ǵımaratynda órt boldy, dep habarlaıdy QazAqparat QR TJM baspasóz qyzmetine silteme jasap.

«5 jeltoqsanda saǵat 15-55-te Pavlodar qalasyndaǵy saıdıngpen qaptalǵan bir qabatty temirbetondy ǵımaratta (tońazytý jáne jeldetý jabdyǵyn shyǵarady) órt shyqty, sondaı-aq kólemi 250 sharshy metr alańda qural-jabdyqtar jandy.

Órtti sóndirýge kelgen órt sóndirýshiler oqıǵa ornynan 5 gaz (27 l.) jáne 2 ottegi, 4 azot, 20 freon ballonyn shyǵardy. Jedel is-qımyldyń arqasynda órt kórshi ǵımarattarǵa taralǵan joq» delingen habarlamada.

Málimetke saı, órt sóndirý bólimsheleri kelgenge deıin 13 adam óz betinshe oqıǵa ornynan evakýatsııalanǵan.

Tilsiz jaý 17:29-da oqshaýlandy.

Qaıtys bolǵandar men zardap shekkender joq.

Órtti sóndirýge 35 órt sóndirýshi men 7 birlik órt tehnıkasy, jedel-qutqarý jasaǵynyń qutqarýshylary, Apattar medıtsınasy ortalyǵynyń medıtsına qyzmetkerleri jumyldyryldy.

Órtti sóndirý jumystary jalǵastyrylýda.