Pavlodarlyq órt sóndirýshiler otqa oranǵan páterden eki balany qutqardy
PAVLODAR. QazAqparat – Pavlodarlyq órt sóndirýshiler órtenip jatqan páterden eki balany qutqardy, dep habarlaıdy QazAqparat Pavlodar oblystyq Tótenshe jaǵdaılar departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, Pavlodar oblysynyń ortalyǵyndaǵy Kataev kóshesiniń boıynda ornalasqan bes qabatty úıden órt shyqqany týraly habar TJD-iń biryńǵaı dıspetcherlik pýltine saǵat 12:23-te kelip tústi. Oqıǵa ornyna dereý «Órt sóndirý jáne avarııalyq-qutqarý jumystary» MM-iń kúshteri attandyryldy.
«Órt ornyna aldymen jetken №4 órt sóndirý beketiniń qyzmetkerleri barlaý júrgizip, ekinshi qabattaǵy úsh bólmeli páterde eki balanyń bar ekenin anyqtady. Qaraýyl bastyǵy Aslanbek Tlenbaev órt sóndirýshilerge saty arqyly joǵaryǵa kóterilip, balalardy qutqarýdy tapsyrdy. Bólimshe komandırleri Sultan Jasqaıratov men Nurbek Shapenov ekinshi qabatqa saty arqyly kóterilip, terezeden alty jáne bes jasar eki er balany alyp shyqty»,-delingen habarlamada.
Sondaı-au onda balalardyń anasy kishkentaı sábıimen dúkenge shyǵyp, balalardy úıde jalǵyz qaldyryp ketkeni aıtylǵan. Órt sóndirýshiler kelgenge deıin podezden 25 adam ózderi shyǵyp úlgergen.
Oqıǵa ornynda órt sóndirý qyzmetiniń bes tehnıkasy men on bes qyzmetkeri jumys istedi. Órt saǵat 12:37-de aýyzdyqtalyp, 12:45-te tolyqtaı sóndirildi. Anyqtalǵandaı, órt balkonǵa joǵarǵy qabattaǵy páterlerdiń birinen ushyp túsken temeki tuqylynan paıda bolǵan .
Pavlodar oblysynyń Tótenshe jaǵdaı departamenti elimiz boıynsha órt qaýipsizdigi aılyǵy júrip jatqandyǵyn habarlaıdy jáne óńir turǵyndaryna órt qaýipsizdigi erejelerin qatań saqtaý qajettigin eskertedi.
