Pavlodarlyq óner ujymy Máskeýde ótken baıqaýdyń bas júldesin jeńip aldy
ASTANA. QazAqparat - Pavlodar oblystyq oqýshylar saraıynyń «Svet zvezdy» úlgili án teatry Máskeý qalasynda ótken «Rojdestvenskıe zvezdy» atty Halyqaralyq jańa jyldyq festıval konkýrsynda jeńimpaz atandy, dep habarlaıdy pavlodarnews.kz.
Baıqaýǵa teatr ánshileri Tamıla Rahymbaeva jáne Darıa Ivanchenko «I'm in Love with a Monster» atty ándi oryndaǵan. Sonymen qatar Medına Kúmisbek jáne Marııa Varlamova birinshi oryndy ıelendi. Medına Shámshi Qaldaıaqovtyń «Baqyt qushaǵynda» ánin, al Marııa «Kalınka-malınka» degen orys halyq ánin shyrqady.
Máskeýlik sahnada alǵash ret óner kórsetken «Svet zvezdy» án teatrynyń «Super LIKE» tobynyń eń kishkentaı juldyzdary ekinshi oryn aldy. Búldirshinder balalarǵa arnalǵan poppýrı oryndady. Jas talanttar oqýshylar saraıynda ónermen tórt jasynan bastap aınalysyp keledi.
«Svet zvezdy» úlgili án teatrynyń jetekshisi Elena Valko balalardyń óner forýmy qyzyqty ótkenin aıtady.
«Konkýrs myńdaǵan balanyń ómirinde keremet mańyzdy oqıǵa bolyp qalady. Onda eńbegi sińgen muǵalimder, mádenıet qyzmetkerleri ózderiniń sheberligimen, talanttarymen bólisti. Uıymdastyrýshylar balalardy jańajyldyq ertegi álemine bólep, merekelik kóńil-kúı syılaı bildi», - deıdi Elena Valko.
Atalmysh festıvalge Polsha, Izraıl, Qazaqstan jáne basqa da elderden óner ujymdary baq synady. Sondaı-aq Reseıdiń 60-tan asa qalasynan qatysýshylar jınaldy. Festıval qatysýshylaryn Reseı Federatsııasynyń mádenıet mınıstri Vladımır Medınskıı, ánshiler Polına Gagarına jáne Anı Lorak, reseılik telejúrgizýshi Oksana Fedorova qarsy aldy.
Festıval-forýmnyń sheńberinde barlyq qatysýshylar Kreml shyrshasyna, Máskeý tsırkine, rollerdrom, haıýanattar baǵyna baryp qydyrdy.
