Pavlodarlyq oqýshylar staqandardan pıramıda qurastyrýdan jarysty
ASTANA. QazAqparat - Pavlodar qalasy bilim berý bóliminiń «Pavlodar daryny» bos ýaqytty qamtý jáne balalardyń daryndylyǵyn damytý ortalyǵy uıymdastyrǵan «Robot-pıramıda» jobasy aıasynda oqýshylar staqandardan pıramıda jasaýdan synǵa tústi, dep habarlaıdy pavlodarnews.kz.
Qalalyq bilim berý bólimi mamandarynyń aıtýynsha, elordada ótip jatqan «EXPO - 2017» halyqaralyq kórmesine arnalǵan jobaǵa Pavlodar qalasyndaǵy № 6, 14, 17, 18, 22, 24, 27, 28, 29, 30, 32, 34, 35, 39, 41 mektepteriniń 3-9 synyp aralyǵynda oqıtyn 159 oqýshy qatysty. - «Robot-pıramıda» jobasynyń birinshi kezeńi úsh tapsyrmadan turdy. Ár komandaǵa 50, 100, 150 staqannan pıramıda daıyndaý úshin eki mınýt ýaqyt berildi. Ádilqazylar oryndaý jyldamdyǵy men pıramıdanyń bıiktigine nazar aýdardy, - deıdi bólim mamany Baljan Ádilhanova.
Jarys qorytyndysy boıynsha birinshi oryn № 17 orta mekteptiń komandasyna buıyrsa, ekinshi oryndy № 22 jáne 24 mektep komandalary ózara bólisti. Al, úshinshi oryndy № 28 jáne 27 mektep komandalary enshiledi. Jeńimpazdar men qatysýshylar gramotalarmen marapattaldy. Al belsendi qatysqandary úshin № 6, 35, 39 mektep komandalaryna alǵys hattar berildi.
Jobanyń ekinshi kezeńi 26 maýsym kúni ótkiziledi.
