Pavlodarlyq Oqýshylar saraıynda jańa ІT-synyp ashyldy
ASTANA. QazAqparat - «Nur Otan» partııasynyń «1000 ІT-synyp» jobasy aıasynda M.M.Kataev atyndaǵy oblystyq Oqýshylar saraıynda ІT-synyp ashyldy, dep habarlaıdy pavlodarnews.kz.
Mektep oqýshylary úshin baǵdarlamalar men robottehnıkany tereńdetip oqytýǵa arnalǵan kabınettiń ashylýyna aımaq basshysy Bolat Baqaýov arnaıy keldi.
«Búgin biz oblys boıynsha bir ýaqytta 15 ІT-synypty ashýdamyz, - deıdi «Nur Otan» partııasy oblystyq fılıaly tóraǵasynyń birinshi orynbasary Ilıa Terenchenko. - Jyl sońyna deıin 20 kabınetti ashý josparda bar. Júıeli jumys kestesi quryldy. ІT ustazdardyń tizimi bekitildi. Osy kabınette sabaq beretin muǵalimder búginnen bastap «Ybyraı» qoǵamdyq qory arqyly oqýǵa kiristi.
Óz kezeginde Bolat Baqaýov az ýaqyt ishinde 15 ІT-synyp ashylsa, jyl sońyna deıin kórsetkishti 20-dan asyrýǵa bolatynyn atap ótti.
«Ybyraı» jas baǵdarlamashylardyń lıgasy» qoǵamdyq qorynyń dırektory Azıza Shýjeevanyń aıtýynsha, kabınetterdiń materıaldyq tehnıkalyq bazasy tolyǵymen jabdyqtalǵan.
«Biz oqý baǵdarlamasyn iske qosý boıynsha belsendi jumys jasaýdamyz, - deıdi Azıza Shýjeeva. - Ár ІT-synyptan eki-úsh adamdy oqytamyz. Tek muǵalimderdi ǵana emes, sonymen qatar túlekterdi tartyp, júıe ákimshisin de daıyndaý josparymyz bar. Ustazdarymyzdyń ІT-mentor bolǵanyn qalaımyz. Úsh aıdan soń baqylaý ótkizip, birinshi modýldiń qalaı júzege asqanyn kóremiz. Trenıngter jasap, úzdikterdi marapattaımyz.
Aıta keteıik, ІT-synypta oqýshylar eýropalyq bilim standartyna saı qarapaıym algorıtmderdiń tizbesin, baǵdarlaý men Web-saıttardy, kompıýter oıyndaryn, anımatsııalardy jasaýdy úırenedi. 2018 jyldyń 1-qyrkúıegine deıin Pavlodar oblysynyń ár aýdany men qalasynda ІT-synyptar ashylady.
