Pavlodarlyq oqýshylar respýblıkalyq zııatkerlik jarysta jeńiske jetti
ASTANA. QazAqparat - 24-29 naýryz aralyǵynda Aqtaý qalasynda qoǵamdyq-gýmanıtarlyq baǵyttaǵy pánder boıynsha respýblıkalyq olımpıada ótti.
Oǵan eldiń túkpir-túkpirinen jınalǵan 586 oqýshy qatysty. Bul týraly «Ertis daryny» óńirlik qosymsha bilim berý oqý-ádistemelik ortalyǵynan habarlady.
Zııatkerlik jarysta oblys komandasy І orynǵa ıe bolyp, «Eń úzdik olımpıadalyq komanda - 2017» atandy.
«Pavlodar oblysynyń namysyn oblystyq pán olımpıadalarynyń 35 jeńimpazy men júldegeri engen komanda qorǵady. Zııatkerlik jarysta pavlodarlyq oqýshylar ózderin joǵary mártebede kórsetip, 23 medalǵa ıe boldy, onyń ishinde 2 altyn, 9 kúmis, 12 qola. Jeti oqýshy «Daryn» RǴPO-nyń Qurmet gramotalarymen marapattaldy», - dep atap ótti Ortalyqtan.
