Pavlodarlyq oqýshylar qumnan Aqorda men «Han Shatyr» ortalyǵyn qalady
Balalar ustazdarymen jáne ata-analarymen birge elordanyń eń ásem ǵımarattaryn qumnan qalaǵan. Onyń ishinde qııalǵa erik bergen jas órender QR Prezıdentiniń rezıdentsııasy Aqordany jasap shyǵarý úshin arnaıy boıaý men jelim, sý emýlsııasyn qoldanǵan.
«Búgingi baıqaýǵa jas ereksheligi ártúrli segiz oqýshy men úsh ata-ana, úsh ustaz qatysty. Aqordany qumnan turǵyzý úshin biraz ýaqyt jumsaýǵa týra keldi. Eki jaqtan jol salyp, jan-jaǵyna shegirgúl otyrǵyzdyq. Tastarmen oıý-órnekterin bezendirip, birlik pen dostyqty beıneleıtin kepter qusyn jáne elimizdiń Týyn ornattyq», - deıdi № 7 jalpy ort bilim berý mektebi dırektorynyń orynbasary Barshagúl Tóńkerhanqyzy.
Jetinshi synyptyń oqýshysy Ámına Qusaıynova qumdy akrıl jáne sýmen aralastyryp, bul ǵımarattyń baǵandary men kúmbezin boıaǵanyn aıtady.
«Men ózim Astanada boldym jáne maǵan elimizdiń bas qalasy qatty unady. Kóptegen kórikti oryndar bar. Ásirese, Aqorda úlken áser etti. Bolashaqta sýretshi nemese sáýletshi bolýdy armandaımyn», - deıdi ol.
Al, № 28 mekteptiń oqýshylary men ustazdary, ata-analary da Aqordany tańdaǵan. Olar munda eki saǵat boıy eńbek pániniń muǵalimi Marına Mýllaıarovamen birge jumys istegen. № 13 mekteptiń oqýshylary «Han Shatyr» ortalyǵyn qumnan qalap shyǵarý úshin úsh saǵat ýaqyt jumsaǵan. № 16 jáne № 35 mektepterdiń ustazdary Elena Strıha men Amangeldi Qasymov birlesip, shákirtterimen Astana qalasyndaǵy sáýlet óneriniń biregeı týyndysy - Báıterekti, Úkimet úıin, Ekspo-qalashyǵyn, «Astana Opera» Memlekettik opera jáne balet teatryn, Tuńǵysh Prezıdent mýzeıin qumnan turǵyzǵan. Sonymen qatar, olar bolashaq qalasyn beınelep, kólik keptelisi máselesin sheshý úshin avtomobıl joldaryn da oılastyrǵan.
