Pavlodarlyq oqýshy Ulybrıtanııa patshaıymynan hat aldy
PAVLODAR. QazAqparat - Hımııa-bıologııa baǵytyndaǵy Nazarbaev Zııatkerlik mektebiniń 11 «D» synyp oqýshysy Islam Súleımenge Ulybrıtanııa patshaıymy II Elızavetadan hat keldi, dep habarlaıdy pavlodarnews.kz.
Bul týraly oqý ornynyń baspasóz qyzmeti málim etti. Islam óz hatynda aldymen Patshaıymnyń álemdik saıasatta alar orny men qosqan úlesi jóninde jazǵan. Budan keıin patshaıymnyń nemeresi Garrı Hanzada men Megan Markldyń shańyraq kóterýimen jáne shóberesi Lýıdiń dúnıege kelýimen quttyqtap, óz tilegin bildirgen. Onyń bul hatty jazýyna bala kezinen Ulybrıtanııa eliniń tarıhyna degen qyzyǵýshylyǵy sebep bolǵan. Sondyqtan bar oıyn jınaqtap, aq qaǵazdyń betine túsirýdi jón kórgen.
«Brıtandyqtardyń ǵasyrlarǵa sozylǵan tarıxy, mádenıeti men tili árqashan baýrap alatyn. Ásirese, zamanaýı ǵasyrda monarxııalyq bılikti áli de saqtap qalyp, dástúrlerin jalǵastyrýyn erekshe atap ótýge bolady. Sońynda belgili tulǵaǵa degen izgi nıetimdi jetkizip, xatty rásimdeýge kiristim. Ustazym bul jumysymdy oń baǵalap, «Qazposhta» arqyly jiberdim», - deıdi ol.
Bir apta ýaqyttyń ishinde kelgen hattyń jaýabynda patshaıym Islamǵa quttyqtaýy úshin alǵys bildirgen.
«Derekterge súıensek, Býkıngem saraıyna álemniń ár jerinen kúnine 300-den astam xat keledi eken. Sonyń ishinde meniń jazbamnyń qaraýsyz qalmaǵany ózimdi erekshe qýantty ári tań qaldyrdy. Shyny kerek, Londonnan resmı jaýapty múldem kútpegen edim. Qýanyshymda shek joq», - deıdi Islam Súleımen.
Jasóspirim sabaqtan tys ýaqytynda maqala jazyp, jýrnalıstıka úıirmesine qatysady jáne týrızm salasyna qatysty ǵylymı jobalar jazýmen aınalysady. «XV Sátbaev oqýlary» Halyqaralyq ǵylymı-praktıkalyq konferentsııasynyń 1 dárejeli dıplom ıegeri, «Jas Medıa» tuńǵysh respýblıkalyq jas jýrnalıster premııasynyń laýreaty. Bolashaqta Londonnyń joǵary oqý ornynda bilim alýdy armandaıdy.
