Pavlodarlyq oqýshy sirińkeden ıAsaýıdiń kesenesin qurastyrdy
ASTANA. QazAqparat - Pavlodarda M.Kataev atyndaǵy oqýshylar saraıynda «Týǵan jer» baǵdarlamasyn iske asyrý maqsatynda «Radýga detskıh talantov» atty oblystyq balalar shyǵarmashylyǵynyń festıvali ótti, dep habarlaıdy pavlodarnews.
Shyǵarmashylyq pen qolóner sheberleriniń festıvalinde keskindeme, toqyma, applıkatsııa, júnmen jumys jasaý, qaǵaz óneri, keste, kvıllıng, peıp-art, tigý, aǵash kesý, metalldy kórkem óńdeý, tabıǵı jáne qaldyqtarmen óńdeý sııaqty 63 jumys usynyldy.
Bul kúni qatysýshylar saıyskerlerdiń tańǵajaıyp shyǵarmashylyq jumystary arqyly qazaq halqynyń mádenıetimen jáne dástúrlerimen tanysty. Baıqaýǵa qosymsha bilim berý uıymdarynan, jalpy bilim berý mektepteriniń oqýshylary men balalar qolóner shyǵarmashylyq baıqaýynyń jeńimpazdary qatysty. Ekibastuz qalasynyń oqýshylary festıvalde belsendilik tanytyp, baıqaýǵa 22 jumys ákeldi.
Al qalǵan qatysýshylar Pavlodar, Aqsý qalasy men Baıanaýyl jáne Maı aýdandarynan kelgen. 7-18 jas aralyǵyndaǵy oqýshylar qazylar alqasyna ózderiniń tańǵajaıyp jumystaryn daıyndap ákeldi. Qazylar alqasy úsh nomınatsııa boıynsha jeńimpazdardy anyqtady. «Beıneleý óneri» nomınatsııasymen kishi jas erekshelik kategorııasy boıynsha Ekibastuz qalasynan kelgen Danııar Eskeldıev «Meniń álemim» sýretimen birinshi oryndy jeńip aldy. Orta jas erekshelik kategorııasy boıynsha Pavlodar qalasynan «Astana - 2050» jumysymen Samıra Amangeldi úzdik atandy.
«Sándik-qoldanbaly shyǵarmashylyq» nomınatsııasy boıynsha kishi jas erekshelik sanatynda №9 mektep - gımnazııasynyń oqýshysy Darıa Kýzmına qaǵazdan «Sý álemi astynda» jumysymen erekshe kózge tústi. Orta jas sanatynda Ekibastuz qalasynan Ksenııa Volkova «Kúı shertken dombyra» atty jumysymen jeńimpaz atandy. Joǵarǵy sanattaǵy qatysýshylardan birinshi orynǵa qol jetkizgen Ekibastuz qalasynan «Ulttyq áshekeıleri» atty applıkatsııa jumysymen Sabına Kolýmbaeva boldy. «Kórkem qolóneri» atty nomınatsııa boıynsha jeńimpaz atanǵandar: kishi jas erekshelik sanatynda Ekibastuz qalasynan - Araılym Karımova, orta jáne joǵarǵy toptan Aqsý qalasy, Qyzyljar mektebinen Temirlan Qalıev jáne Sultan Jýtaev boldy. Araılym kapronnan gúlder jasasa, Temirlan - sirińkeden kesene jasady, al Sultan metaldan qyran jasap barsha jurtty tań qaldyrdy.
"Bul kesene eki jylda ázirlenip, 1360 qorap paıdalanyldy. Budan basqa, temirden qyran búrkit jasadyq. Bul óte qúrdeli jumys. Shydamdylyqty talap etedi. Ózimizdiń «Sheber qoldar» úıirmemiz bar. Jumystardyń barlyǵy óte keremet", - deıdi Aqsý qalasy Qyzyljar orta mektebiniń ustazy Asqar Aqanov.
