Pavlodarlyq oqýshy oń jaq rýldi avtokólikterge arnalǵan qurylǵy oılap tapty
ASTANA. QazAqparat - Pavlodar oblysynyń kóp salaly daryndy balalarǵa arnalǵan lıtseı-ınternatynyń 10-synyp oqýshysy Mıras Shakrat oń jaq rýldi avtokólikterge arnalǵan qurylǵy jasap shyǵardy, dep habarlaıdy pavlodarnews.kz.
S. Toraıǵyrov atyndaǵy Pavlodar memlekettik ýnıversıtetiniń kovorkıng-ortalyǵynda Startup Weekends bıznes-ıdeıalarynyń aımaqtyq kezeńi ótti.
«Stýdentter men magıstrlardyń arasynda bizdiń oqýshylarymyz Mıras Shakrat jáne Baýyrjan Qapenov óz jobalaryn qorǵap shyqty, - deıdi oblystyq kóp salaly daryndy balalarǵa arnalǵan lıtseı-ınternaty dırektorynyń orynbasary Gúlnar Nurǵazına. - Olar Mıras Megamozg (qaýipsiz júrgizý) jobasyn tanystyrdy. Ol oń jaq rýldi avtokólikterge arnalǵan qurylǵy oılap tapty. Datchık arqyly basqa kóliktiń qarama-qarsy jolda kele jatqandyǵy kórsetiledi. Atalmysh qurylǵyǵa qazylar joǵary baǵa berdi. Sonymen qatar Baýyrjan «Óz mamandyǵyńdy tańda» atty saıttyń prototıpin qorǵady. Túlekter men oqýshylarǵa arnalǵan joba kópshiliktiń qyzyǵýshylyǵyn týdyrdy. QR túlekteriniń 92 paıyzy onlaın-saraptama nátıjesinde osy saıttyń paıdaly ekendigin aıtty».
Mamandardyń bul jobalarǵa bergen joǵary baǵasy Mıras pen Baýyrjannyń «Meniń armanym» konkýrsynyń respýblıkalyq kezeńine ótýge múmkindik berdi.
«Daryndy oqýshylarymyz adamzattyń máselelerin sheshý men bolashaq úshin eńbektenýge daıyn ekenin aıtýda, - deıdi Gúlnar Nurǵazına. - Mıras pen Baýyrjannyń jobalary avtorlyq bolyp tabylady. Biz olarǵa qashan da qoldaý berýge daıynbyz. Mıras bıznes-ıdeıasynyń avtorlyq quqyǵyn tirkep, óz kásibin jetildirýdi kózdeıdi».
