Pavlodarlyq oqýshy qoljazbany tsıfrlyq formatqa aýystyratyn qosymsha jasady
Karantın ýaqytynda qashyqtan oqyp, ǵylymı izdenisterin damytqan jas ónertapqysh sol arqyly mektep arhıvin tsıfrlandyrýǵa úles qosýǵa tyrysqan.
«Android júıesine arnalǵan baǵdarlama eki aı ishinde Java platformasynda OpenCV jáne DL4J ashyq kitaphanalary negizinde jasaldy. Meni neırondyq jeliler qyzyqtyrady. Basynda Java arqyly jańadan neırondyq jeli qurastyrǵan edim. Alaıda ondaǵy úırený men boljaý jyldamdyǵy tómen bolǵandyqtan, jumysty DL4J-ǵa kóshirdim», - deıdi Alar Berikuly.
Jasandy ıntellekt salasynda jańalyq ashýdy maqsat tutqan oqýshyǵa Toraıǵyrov ýnıversıtetiniń dotsenti Darııa Ábikenova kómektesken.
Baǵdarlamanyń jumys prıntsıpine kelsek, atalǵan mobıldik qosymsha qazaq tilindegi qoljazbalardy skanerlep, ony elektrondyq formatqa kóshiredi. Sol arqyly eski qujattar men hattardy qaıta terýdiń qajeti bolmaıdy.
«Baǵdarlamany áli damytýǵa bolady. Mysaly, dáriger retseptin oqyǵan adamdar medıtsınalyq termınderdi izdep áýre bolady. Baǵdarlama bólek jazylǵan sózderdi ǵana tanı alady. Biraq keıbir adamdar olaı jazbaıdy. Sol sebepti qoljazba mátin men rekkýrentti neırondyq jelini biriktirý arqyly kez kelgen qoljazbany erkin tanı alatyn júıe jasaýǵa bolady», - deıdi Alar Berikuly.
11-synyp oqýshysynyń ustazy Aıdar Shaıhımov aıtyp ótkendeı, qosymsha tolyǵymen ázir bolyp, patent alynǵannan soń Play Market-te ornalastyrylady. Aıtýynsha, «Jas daryn» mektebiniń oqýshylary odan bólek, E-kitaphana jáne E-ashana baǵdarlamalaryn jasaǵan. Olarǵa basqa mektepter de qyzyǵýshylyq tanytýda.
Qazaqstannyń ǵylymyna úles qosýǵa bekingen Alar Berikuly aldaǵy ýaqytta IT nemese neırondyq jeliler salasynda izdenisterin jalǵastyrýǵa nıetti.