Pavlodarlyq oqýshy halyqaralyq olımpıadada úsh jyl qatarynan altyn medal ıelendi
PAVLODAR. QazAqparat - 9-13 qańtar kúnderi Almatyda matematıka, fızıka jáne ınformatıka pánderi boıynsha HVІ Halyqaralyq Jáýtikov olımpıadasy ótti, dep habarlaıdy pavlodarnews.kz.
Barlyǵy 21 elden 84 komanda jalpy sany 599 oqýshy báıgege túsken bilim dodasynda Pavlodar qalasy hımııa-bıologııa baǵytyndaǵy Nazarbaev Zııatkerlik mektebiniń 12 synyp oqýshysy Dııar Týlenov altyn medalǵa ıe boldy. Olımpıadada Qazaqstan, Ázerbaıjan, Armenııa, Belarýs, Bolgarııa, Grýzııa, Danııa, Qyrǵyzstan, Mońǵolııa, Nepal, Norvegııa, Birikken Arab Ámirlikteri, Reseı, Rýmynııa, Serbııa, Tájikstan, Túrikmenstan, Túrkııa, Ózbekstan, Ýkraına jáne Shvetsııa elderiniń eń úzdik oqýshylary qatysqan bolatyn.
«Dııar shoqtyǵy bıik halyqaralyq bilim dodalarynyń eń aýqymdysy sanalatyn Jáýtikov olımpıadasynda qatarynan úshinshi jyl altyn medalǵa ıe bolyp otyr. Oqýshymnyń jetistigin óte joǵary baǵalaımyn. Qýanyshymda shek joq», - deıdi 7-synyptan bastap olımpıadaǵa daıyndap kele jatqan fızıka pániniń ustazy Nazymgúl Karımova.
Atap ótý kerek, Dııar osyǵan deıin Jaýtikov olımpıadasynda 2017 jyly qola medal, 2018, 2019 jyldary altyn medal ıegeri atanǵan bolatyn. Ol tek mektep namysyn ǵana emes, respýblıka atynan Halyqaralyq fızıka olımpıadasynda, «Týımaada» halyqaralyq olımpıadasynda jáne basqa da halyqaralyq deńgeıdegi bilim dodalarynda top jaryp, júldeli oryndardy ıelendi. «Olımpıada jyldaǵydaı óte joǵary deńgeıde ótti. Meniń bólimimde osy joly 170 oqýshy baq synasqan bolatyn. Osy oraıda jyldar boıy bilimimdi ushtap, durys baǵyt-baǵdar bergen ustazym Nazymgúl Barıtqyzyna, únemi qoldaý kórsetetin ata-anama, sondaı-aq altyn uıa – mektebime alǵysymdy bildiremin», - deıdi jeńimpaz.
Osy jetistikteriniń nátıjesinde búgingi tańnyń ózinde Dııar 3 ýnıversıtet - Reseıdiń joǵary ekonomıka mektebi, Nazarbaev Ýnıversıteti jáne Qazaq- Brıtan ýnıversıtetiniń grantyna ıe bolǵan. IELTS halyqaralyq emtıhanynyń nátıjesi boıynsha da joǵarǵy kórsetkishke qol jetkizip, 8,0 upaı jınady. Dııar elimizdegi eń myqty 8 fızıktiń qataryna engen oqýshy.