Pavlodarlyq oqýshy Grýzııada «Mini Miss Multinational 2019» baıqaýynyń bas júldesin jeńip aldy
NUR-SULTAN. QazAqparat - Grýzııada ótken «Little Miss&Mister Universe 2019» sulýlyq, óner jáne stıl halyqaralyq baıqaýynda «Jas daryn» mamandandyrylǵan mektebiniń «8» synyp oqýshysy Kamılla Dýppaeva «Mini Miss Multinational 2019» bas júldesi men «Miss Grace 2019» tıtýlyn jeńip aldy, dep habarlaıdy pavlodarnews.kz.
5-10 mamyr aralyǵynda Tbılısı jáne Batýmı qalalarynda 13-15 jas aralyǵyndaǵy jetkinshekter arasynda ótken baıqaýda Avstralııa, Fıllıpın, Taıland, Rýmynııa, Nıderland, Vetnam, Úndistan, Azııa, Afrıka jáne Latyn Amerıkasy sııaqty 35 eldiń ókilderi baq synǵan.
«Baıqaýdyń birinshi kúni tanysý qurmetine arnalǵan merekelik sharamen bastaldy, Kelesi kúni belgili grýzındik dızaıner Maııa Tavadze usynǵan kıimdermen sán kórsetilimine qatystyq. Sondaı-aq, ózimiz alyp barǵan altyn tústi kóılektermen shyqtyq. Barlyq qyzdar 1920-1930 jyldardaǵy retro stılinde kıinip, toptyq fotosessııa uıymdastyryldy. Budan keıin balalar úıine baryp, ol jerdiń tárbıelenýshileri kontsert usyndy. Men de án aıtyp, bı bıledim jáne Qazaqstannan alyp barǵan shaǵyn syılyqtardy tabystadym. Eń sońynda qazylar alqasy sheshim qabyldap, meniń ónerimdi eń joǵarǵy upaımen baǵalady» - deıdi Kamılla.
Mektep dırektorynyń tárbıe isi jónindegi orynbasary Gúlsheker Belgibaevanyń aıtýynsha, Kamılla bilim ordasynda ótetin qoǵamdyq sharalarǵa óte belsendi qatysady.
Atalmysh baıqaý barysynda qazaq eliniń qonaqjaılylyǵy jáne kóshpendiler týraly aıtyp bergen. Jas óren bolashaqta qonaqúı kesheni bıznesi salasyn damytýdy armandaıdy
Budan basqa, 2020 jyldyń 4-10 qańtar aralyǵynda Tbılısıde qazylar alqasynyń múshesi bolýǵa shaqyrtý alǵan. Kamıllanyń týǵan tátesi Gúlmıra Dýppaeva jaqsy tárbıe berip, daıyndaǵany jáne belsendilik úshin «Best Parent of Universe 2019» lentasy jáne qurmet gramotasymen marapattalǵan.
Eske sala keteıik, 8 «G» synyp oqýshylary Azıza Jumaǵulova men Kamılla Dýppaeva Almaty qalasynda ótken «Nur Nayryz Fest» respýblıkalyq rýhanı jańǵyrý festıval-konkýrsynda «Jas ǵalym» jáne «Zamanýı ulttyq kıim úlgisi» nomınatsııasy boıynsha qatysyp, bas júldeni jeńip alǵan bolatyn.
