Pavlodarlyq oqýshy Apple kompanııasynyń júldesin jeńip aldy

PAVLODAR. QazAqparat - Hımııa-bıologııa baǵytyndaǵy Nazarbaev Zııatkerlik mektebiniń oqýshysy Erkebulan Eljan alpaýyt Apple kompanııasynyń «Swift Student Challenge» atty saıysynda jeńimpaz atandy. Bul jóninde pavlodarnews.kz resýrsyna silteme jasap QazAqparat habarlaıdy.

Bilim ordasy baspasóz qyzmetiniń málimetinshe, qýanyshty habar oqýshynyń elektrondy poshtasyna kelip túsken. Atalmysh saıysqa jas zııatker aýtızmmen kúresip júrgen balalarǵa arnalǵan óziniń mobıldi qosymshasyn usynǵan.

- Jarycqa álemniń 41 elinen mıllıondaǵan adamdar ótinish bergen, - deıdi Erkebulan. - Osyǵan deıin jeńimpazdar qatarynan tabylǵan qazaqstandyqtardyń sany saýsaqpen sanarlyq eken. Álemniń eń aýqatty kompanııasynyń úzdik ınjenerlerimen qoıan-qoltyq jumys jasaý múmkindigine ıe bolǵanym meni óte erekshe sezimge bóleıdi. Bul kimge de bolsyn arman dep esepteımin.

Jarys barysynda álem boıynsha eń úzdik 350 qosymsha tańdap alyndy. Jeńimpaz kompanııanyń eksklıýzıvti kúrteshesi men Apple Developer Program baǵdarlamasy boıynsha bir jyl kóleminde barlyq qurylǵylardy tegin paıdalaný múmkindigine ıe boldy.

Oǵan qosa, Apple ınjenerlerimen onlaın «jeke» kezdesýlerde sabaq alyp, sheberlik saǵattaryna qatysay.

- Men aýtızmmen kúresip júrgen balalarǵa arnalǵan qosymshany jasap shyǵardym. Bul baǵdarlama arqyly adamdardyń emotsııasyn anyqtaý áldeqaıda ońaı bolady. Sonymen qosa, ınterfeıs tolyqtaı balalarǵa qolaıly etip jasalyndy. Taǵy bir ereksheligi, 2019 jylǵy prezentatsııadaǵy ozyq tehnologııalar osy qosymshada qoldanyldy, - deıdi oqýshy.

Jeńimpazdar jyl saıyn álemniń eń úzdik ázirleýshilerin bir arnaǵa toǵystyratyn WWDC konferentsııasyna qatysa alady. Bıyl 22 maýsymda bastalatyn aýqymdy shara 31-shi ret uıymdastyrylyp otyr.

Ádette dástúrli doda jeńimpazdary Kalıfornııadaǵy Apple Park ǵımaratynda tórtkúl dúnıe kóz tikken WWDC prezentatsııasyna qatysyp, keıinnen bir apta boıy Apple kompanııasynyń bas dırektory Tım Kýkpen kezdesip, eń myqty ınjenerlerden sabaq alatyn.

Alaıda osy jyly COVID-19 pandemııacyna baılanysty uıymdastyrýshylar barlyq is-sharalaryn onlaın formatta ótkizedi. Mıllıondaǵan ázirleýshi iOS, iPadOS, macOS, watchOS jáne tvOS bolashaq nusqalaryna qol jetkize alady.

Sondaı-aq búkil álem boıynsha Apple paıdalanýshylarynyń ómirin jaqsartatyn qosymshalardy jasaıtyn Apple ınjenerlerimen qashyqtyqtan ótken kezdesýde bilimderin arttyrady.