Pavlodarlyq oqýshy AQSh-taǵy beldi ýnıversıtettiń grantyna ıe boldy
NUR-SULTAN. QazAqparat –Pavlodarlyq Vladıslav Cherdantsevqa grant usynǵan Massachýsets tehnologııalyq ınstıtýty álemdegi ataqty ýnıversıtetterdiń bestigine kiredi, dep habarlaıdy pavlodarnews.kz.
Oblystyq bilim berý basqarmasynyń baspasóz hatshysy Baǵdáýlet Nurmattyń málimdeýinshe, daryndy balalarǵa arnalǵan №8 mektep-lıtseıiniń 11-synyp oqýshysy Vladıslav Cherdantsev Massachýsets tehnologııalyq ýnıversıtetinde (AQSh) oqýǵa tolyq grant jeńip aldy.
«Ýnıversıtet Vladıslavtyń jetistikterin kórgennen keıin oqý garntyn berip otyr, - dedi Baǵdáýlet Nurmat.
Kembrıdj qalasynda ornalasqan oqý orny álemdegi ataqty ýnıversıtetteriniń alǵashqy bestigine kiredi. Ýnıversıtet robototehnıka jáne jasandy ıntellekt sektorlary jáne aqparattyq tehnologııa, fızıka, hımııa jáne matematıka salalaryn oqytý júıeleri eldegi eń tańdaýly bolyp sanalady.
Sonymen qatar, ýnıversıtet menedjment, ekonomıka, lıngvıstıka, saıası ǵylymdar jáne fılosofııa salalaryn oqytýymen de tanymal.
Vladıslav Cherdantsev – halyqaralyq jáne respýblıkalyq olımpıadalardyń jeńimpazy jáne júldegeri.
«Vladıslav Mınsk jáne Sankt-Peterbýrgte ótken hımııadan halyqaralyq Mendeleev olımpıadasynyń qola júldegeri, Nıderlandydaǵy halyqaralyq jaratylystaný jasóspirimder olımpıadasynda da jeńis tuǵyrynan kóringen. 2019 jyldyń shildesinde Parıjde ótken Mendeleev olımpıadasynyń kúmis medalin jeńip aldy», - dedi Baǵdáýlet Nurmat.
Aıta keteıik, Vladıslav Cherdantsev jaqynda ǵana Tuńǵysh Prezıdent qorynyń 1 mln teńge syıaqysyna ıe bolǵan bolatyn.
