Pavlodarlyq nurotandyqtar Arys turǵyndaryna 90 tonna gýmanıtarlyq kómek jóneltti
"Nur Otan" partııasy oblystyq fılıaly tóraǵasynyń birinshi orynbasary Nıkolaı Dychko habarlaǵandaı, eki táýlik ishinde 90 tonnadan astam gýmanıtarlyq kómek jıystyryldy.
«Pavlodar oblysy elimizdiń ózge de óńirleri sekildi arystyqtardyń muń-muqtajyna beıjaı qaramaı, kómek qolyn sozýǵa bel býdy. Búginde 90 tonnadan astam kómek jınaldy. Olardy bes júk mashınasyna tıedik. Taǵy bir mashına Ekibastuzdan qosylady. Gýmanıtarlyq kómek Shymkentke deıin jol júredi de, ony sol jerde Arys turǵyndaryna úılestiredi»,- deıdi Nıkolaı Dychko.
Partııalyq basshy atap ótkendeı, pavlodarlyqtar úlken-kishi demeı, bir adamdaı jarylystardan zardap shekkenderge qol ushyn berýge tyrysty. Tipti, bir aqsaqal óz shapanyn berip ketken kórinedi. Jalpy 90 tonna júktiń ishinde azyq-túlik, kıim-keshek pen tósek oryndar bar. Oǵan qosa, óńirde ornalasqan partııa fılıaldarynyń qyzmetkerleriniń barlyǵy arystyqtyqtardyń qajettiligine bir kúndik jalaqylaryn jumsady.
Esterińizge sala keteıik, Pavlodar oblysynyń ákimi Bolat Baqaýov Arys qalasynyń 300 balasyn saýyqtyrý lagerlerine qabyldaýǵa ázir ekendigin málimdegen bolatyn. Odan bólek, Pavlodar oblysynyń memlekettik qyzmetshileri bir kúndik jalaqysyn Arys turǵyndaryna aýdardy.
