Pavlodarlyq mýzeıde Elbasynyń jeke zattary kórmege qoıyldy
«Elbasynyń bes qyry» jobasy aıasynda uıymdastyrylǵan kórmede Elbasynyń balalyq shaǵynyń kýási bolǵan - oqýshy kezinde otyrǵan partasy men alǵash qolyna ustaǵan dombyrasy, shapany sııaqty qundy zattardy kezdestirýge bolady. Kórmeniń ashylýyna kelgen pavlodarlyqtar áýeli Nursultan Ábishuly Nazarbaevtyń balalyq shaǵyn sýretteıtin «Balalyq shaǵymnyń aspany» derekti fılminde Elbasy ómirge kelgen jaılaý men Shamalǵan aýylynda turǵan úıdiń tolyq kórinisin tamashalady. Budan keıin Elbasy ózi aıtqan balalyq shaǵy týraly áńgimesine túsirilgen beınefılm usynyldy. Oblystyq G.N.Potanın atyndaǵy tarıhı-ólketaný mýzeıiniń ólke tarıhyn ǵylymı qamtamasyz etý bóliminiń basshysy Dınara Opabekovanyń aıtýynsha, merekege oraı uıymdastyrylǵan kórme 4 bólimnen turady.
«Bul bólimder Nursultan Ábishulynyń balalyq shaǵymen tikeleı baılanysty. Elbasynyń bala kezindegi armanynyń biri - ushqysh bolý edi. Ol tek arman kúıinde qalsa da biz kórmege ushaqtyń maketin qoıýdy jón kórdik. Sondaı-aq, Qazaq elin alma men qyzǵaldaqtyń Otany dep jatamyz. Jalpy alǵanda alma men qyzǵaldaqtyń da Tuńǵysh Prezıdentimizdiń balalyq shaǵynda alatyn orny erekshe. Budan bólek, ol kisi bala kezinde sportqa de óte jaqyn bolǵan. Sonda jetken jetistikteri men marapattaryn da qamtýǵa tyrystyq», - deıdi Dınara Opabekova.
Sonymen qatar, kórmeden Elbasynyń jazǵan kitaptaryn jáne Pavlodar óńirine jasaǵan sapary kezinde túsirilgen fotosýretterdi de kezdestirýge bolady. Jalpy 150-ge jýyq eksponat qoıylǵan kórmeden eksklıýzıvti zattar oryn alǵan.
«Aımaǵymyzdaǵy elektrolız zaýyty men alıýmınıı zaýytynyń ekinshi qatary ashylǵan kezde Elbasy ózi kelip qatysyp, alıýmınııdiń bir kesegin ustap turyp sýretke túsken eken. Al 1997 jyly sol zaýyt salynady dep negizi qalanǵan kezde de ol kisi qolyna qalaqsha alǵan. Osy tarıhı sátterdiń barlyǵy taspalanǵan sýretter kórmeniń bir bóligin alyp tur. Jýyrda mýzeı qoryna Alıýmınıı zaýyty osy qundy sýretter men Elbasy óz qolymen ustaǵan alıýmınııdiń kesegin jáne qalaqshany bizge bergen bolatyn. Búgingi kórmege qoıylǵan erekshe zattardyń biregeıi – osylar», - dep atap ótti Dınara Opabekova.