Pavlodarlyq músinshi shynydan úsh metrlik qobyz jasaýda

Sholpan Sadýova buǵan deıin Ulttyq dombyra kúnine oraı Aqtaýǵa arnaıy tapsyryspen bıiktigi úsh metr shyny dombyra jasaǵanyn aıtady. Sondaı-aq, mundaı týyndylar ózi eńbek etetin joǵary oqý orny men Pavlodar mashına jasaý kolledjinde ornatylǵan. Al, eń alǵashqy jasaǵan bıiktigi 1,5 metrlik jumysyn úsh jyl buryn óziniń týǵan jeri Sharbaqty aýdanynyń Esilbaı aýylyna syıǵa tartqan.

«Atyraýlyq bir mekemeden bıiktigi úsh metrlik qobyzǵa tapsyrys tústi.  Búgingi tańda jumystyń basym bóligi aıaqtalyp qaldy. PMÝ-dyń aldyndaǵy dombyrany stýdentter birge úsh kúnniń ishinde jasap shyqtym. 800-900 gradýsta kúıdirilgen keıin ony kirpish uryp syndyrý múmkin bolmady», - deıdi Sholpan Sadýova.

Jalpy, shyny qaldyqtaryn qaıta óńdeý arqyly ártúrli buıymdar jasaý Amerıka, Qytaı, Japonııa, Túrkııa elderinde jaqsy damyǵan.

Músinshiniń aıtýynsha, qalada kúnine 3 tonnaǵa jýyq shyny qaldyqtary shyǵady. Qatty turmys qaldyqtarynyń ishinde eń aýyr túri sanalatyn shyny mıllıondaǵan jyldar jatady. Al, eń qatty ári qalyń temirlerdiń ózi 150 jyldyń ishinde shirip ketedi. Máselen, alıýmınıı 600 gradýsta, shyny 900 gradýsta erip ketedi. Odan kirpish, músin, kafel jasaýǵa bolady. Pavlodar oblysynda 1 400 gradýsta kúıdiriletin ári qulaǵanda synbaıtyn eń myqty saz balshyq Maı aýdanynda kezdesedi. Sondaı-aq, túrli qalyp jasaý úshin Krasnoarmeıka jáne Kenjekól aýyldaryndaǵy saz balshyqtar paıdalanylady.

«Áınekti óńdeý bala kezdegi armanym edi. Dekanymyz Marat Kýderın rektor arqyly Túrkııanyń Mımar Sınan Gúzel Sanatlar ýnıversıtetine oqýǵa jiberip, sol jaqta 1 jyl, segiz aı shyny jáne keramıka fakýltetinde biliktiligimdi arttyryp keldim. Bul jumys kóp izdenisti talap etedi, hımııa, fızıka jáne syzý geometrııasyn jaqsy bilý kerek. Ǵylymı jumysty dáleldegennen keıin grantqa pesh satyp alyp, PMÝ-dyń zerthanasyna ornalastyrdyq»,  - deıdi ol.

Sol jerde stýdentter men magıstranttar birge jumys jasaıdy. Bıyl da Ekibastuz, Astana, Semeı óńirlerinen tapsyrystar túsýde.