Pavlodarlyq qutqarýshylar jabdyqtalmaǵan jaǵajaıda reıd ótkizdi
PAVLODAR. QazAqparat - Qutqarýshylar, polıtsııa jáne sheneýnikter pavlodarlyqtarǵa arnaıy jabdyqtalmaǵan jerde shomylmaý kerektigin eskertýde, dep habarlaıdy QazAqparat tilshisi.
«Daýyldy eskertýge baılanysty úsh jaǵajaıda jáne ruqsat etilmegen jerlerde kezekten tys reıd júrgizildi, - dep málim etti Pavlodar ákimdiginen. - 180 demalýshyǵa qaýipsizdik erejelerin saqtaý jóninde 110 únparaq, sondaı-aq broshıýralar men eskertpeler taratyldy».
Ertis jaǵasyndaǵy reıdtik is-sharalardy uıymdastyrýshylar - Pavlodar qalalyq tótenshe jaǵdaılar jónindegi basqarma qyzmetkerleri, Pavlodar oblysy jedel-qutqarý jasaǵy, TJD apattyq-qutqarý jumystary jáne órt sóndirý qyzmeti jáne qalalyq ІІB jergilikti polıtsııa qyzmeti.
«Aǵymdaǵy jyly shomylý maýsymy bastalǵaly beri demalys jáne mereke kúnderi 11 962 adamdy qamtyǵan 18 reıd uıymdastyryldy. Іs-shara kezinde 8481 únparaq, broshıýra jáne jadynamalar taratyldy»,-deıdi qala ákimdiginen.
Bıyl shomylý maýsymy bastalǵaly Pavlodar qalasynda 7 adam sýǵa ketti. Onyń úsheýi - balalar. Qaıǵyly oqıǵalardyń negizgi sebebi - shomylýǵa arnap jabdyqtalmaǵan jerde sýǵa túsý jáne balalardyń ata-ana qaraýynsyz shomylýy.
