Pavlodarlyq qutqarýshy adamdardy órt sóndirýshiler kelgenge deıin qutqardy
QR Tótenshe jaǵdaılar mınıstrligi baspasóz qyzmetiniń habarlaýynsha, Pavlodar oblysy Tótenshe jaǵdaılar departamenti Órt sóndirý qyzmetiniń №4 órt sóndirý bóliminiń órt sóndirýshi-qutqarýshysy azamattyq qorǵaý kishi serjanty Marlen Ábenov qutqarý jumystaryn arnaıy qyzmet kelgenge deıin uıymdastyrǵan.
Naqtyraq aıtqanda ol 28 jeltoqsan kúni jumystan bos ýaqytynda kóshede kele jatyp, turǵyn úılerdiń biriniń shatyrynan tútin shyǵyp jatqanyn kórgen. Ne bolǵanyn birden túsingen tájirıbeli qutqarýshy 9-qabatqa kóterilip, balaly áıel men 4 adamdy qaýipsiz jerge alyp shyqqan.
Al qutqarýshylar osy kúni 9 qabatty turǵyn úıden órt shyqqany týraly habar boıynsha oqıǵa ornyna jetken. Órt sóndirýshiler qajetti jergen kelgende qoıma retinde paıdalanylyp júrgen birinshi qabattaǵy qoqys jınalatyn ǵımaratta órt bolyp jatqanyn anyqtaǵan. 9-qabatqa deıingi alańdy qoıý tútin basqan. 9-qabattaǵy №54 páterdiń 2000, 2022 jáne 2019 jyldary týǵan turǵyndary gazdan ýlanyp qalǵan, olar aýrýhanaǵa jatqyzyldy.
Órt sóndirý kezinde TJD kúshteri 4 balany qutqaryp, baspaldaq arqyly 18 adamdy evakýatsııalady.
Órtti sóndirýge 21 órt sóndirýshi jáne 6 birlik tehnıka jumyldyryldy.
Oqıǵa ornynda kómek kórsetý úshin jedel-qutqarý jasaǵynyń qutqarýshylary men Apattar medıtsınasy ortalyǵynyń qyzmetkerleri jumys istedi.
«Órt aýdany 5 sharshy metrdi qurap, saǵat 11:13-te sóndirildi. Órttiń shyǵý sebebi men keltirilgen zalal anyqtalýda»,-delingen habarlamada.
