Pavlodarlyq qurttyń 30 túrin óndirýde
ASTANA. QazAqparat - Aqsý qalasyna qarasty Mámáıit Omarov aýylyna «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda elimizdiń ońtústik óńirinen bıyl kóship kelgen Abylaı Ýkashaev jeke kásipkerlikpen aınalysýdy josparlap otyr, dep habarlaıdy pavlodarnews.kz.
Qala ákimi baspasóz qyzmetiniń habarlaýynsha, Tarazdan kelgen azamat Táýelsizdik kúni qarsańynda uıymdastyrylǵan aýyl sharýashylyǵy jármeńkesine qurttyń 30 túrin usynǵan.
«Elbasynyń Ońtústik Qazaqstan oblysyndaǵy jurtshylyqty soltústikke kóshirý baǵdarlamasyna dán rızamyz. Aqsý qalasy men aýyldyq aımaqtyń ákimdigi barynsha qoldaý kórsetip, 1000 gektar jer usyndy. Bıyl 17 gektaryna alǵash ret kartop ekken edik. Ónim jaqsy shyqty. Endi qys mezgilinde qurt jasaýmen aınalysyp jatyrmyz. Búgingi jármeńkege túıe, sıyr, qoı sútinen jıyrma túrin Tarazdan ákeldik. Kelisi 1900-2200 teńgeden. Turǵyndarǵa unap jatyr. Kópshiligi tań qalysyn jasyrmady. Sebebi, Tarazda qurttyń otyz túrin jasaıtyn edik. Memleket tarapynan berilgen bir mıllıon teńgege baspana satyp aldyq» - deıdi ol.
«Úı Jánnát Agro» JShS basshysy Abylaı Ýkashaev keler jyldyń kókteminde 750 gektar jerge bıdaı, 100 gektarǵa kartop jáne 11 túrli kókónis egýdi kózdep otyr.
Buǵan qosa, memlekettik baǵdarlama aıasynda Germanııadan golshteın tuqymdy sútti sıyr satyp alyp, ferma salý da josparynda bar. «Rýhanı jańǵyrý» baǵdarlamasy aıasynda ulttyq taǵamdardy nasıhattaý maqsatynda bir apta buryn «Dostyq» bazarynyń ishinen qurt ortalyǵyn ashqan. Aýyl sharýashylyǵy ónimderiniń jármeńkesine qalaǵa qarasty aýyldyq aımaqtardyń sharýashylyqtary men qalanyń jeke kásipkerleri qatysty. Munda sıyr etiniń kelisi 1200-1400, jylqy eti 1600 teńgeden satyldy.
Sondaı-aq qus, qoı eti, balyq, sút ónimderi usynyldy. Budan bólek, 5 tonna kartop, 3 jarym tonna kókónis saýdaǵa shyǵarylǵan.
Jergilikti kórkemónerpazdar merekelik kontsert usynyp, kópshiliktiń kóńilin kóterdi.
